Մայիսի 1-ին Չինաստանում կմեկնարկի «Շանհայ էքսպո 2010»համաշխարհային ցուցահանդեսը
24-04-2010 21:30:00 | Հայաստան | Տնտեսություն
ԵՐԵՎԱՆ, 24 ԱՊՐԻԼԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Մայիսի 1-ին
Չինաստանում կմեկնարկի «Շանհայ էքսպո 2010» համաշխարհային
ցուցահանդեսը` «Բարեկեցիկ քաղաք, բարեկեցիկ կյանք» խորագրով:
ՀՀ Էկոնոմիկայի նախարարությունում կայացած ասուլիսում
վիրտուալ ձեւով ցուցադրվեց Շանհայում հայկական տաղավարը, որը
գտնվում է եվրոպական տաղավարի հատվածում եւ զբաղեցնում է հատկացված
540 քմ-ից 324 քմ-ը: Հայաստանը ցուցահանդեսին կներկայանա
«Աշխարհի քաղաք» նախագծով: Վիրտուալ քաղաքում կա 16-18 թաղամաս:
«Աշխարհի քաղաք»-ը ծավալվում է Արարատ լեռան առջեւ. գաղափարի
խորհուրդն այն է, որ Նոյը ջրհեղեղից հետո Արարատից իջել է ցամաք:
Հայկական տաղավարի տարածքում լինելու է նաեւ բիզնես կենտրոն`
հագեցած համակարգիչներով եւ հեռուստացույցներով, որտեղ
բանակցություններ կվարվեն եւ ցանկացողներին կներկայացվի հայկական
ապրանքների ողջ տեսականին: Հայաստանի տաղավարում 6 ամիսների
ընթացքում կանցկացվեն «Ծիրանի ծառ», «Ոսկի եւ մետաքս», «Հայաստան`
առողջության քաղաք», «Հայաստանը Աֆրիկայի համար», «Վերադարձ
ակունքներին» եւ այլ միջոցառումներ:
Հայաստանի ազգային օրը
ցուցահանդեսում կնշվի սեպտեմբերի 21-ին:
ՀՀ էկոնոմիկայի փոխնախարար
Արա Պետրոսյանը հայտնեց, որ մայիսի 1-ից «Աշխարհի քաղաք»-ը
հասանելի կլինի www.expo.cn կայքում: Ըստ նրա, կազմակերպիչները
միայն Հայաստանին թույլատրել են յուրաքանչյուր ամիս
թարմացնել «Աշխարհի քաղաք»-ը:
«Էքսպոյին չմասնակցելն անթույլատրելի
է Հայաստանի համար: Սրա տնտեսական նշանակությունը բավականին հզոր
է: 70-100 մլն այցելու է լինելու»,- ասաց Ա. Պետրոսյանը: Նրա
խոսքերով, յուրաքանչյուր 20 կամ 30-րդ այցելուն Հայաստան եկող
զբոսաշրջիկ կարող է լինել, իսկ 100-րդը` գործարար, որը կապեր
կհաստատի հայ գործարարների հետ:
Զարգացման հայկական գործակալության տնօրեն Ռոբերտ
Հարությունյանը նշեց, որ ցուցահանդեսին մասնակցելու համար
պետբյուջեից նախատեսված է հատկացնել 500 մլն դրամ (1մլն 250 հազար
դոլար) եւ մոտ 650 հազար դոլարի չափով ֆինանսական աջակցություն
կցուցաբերի չինական կողմը: Ի դեպ, «Շանհայ էքսպո 2009»-ին
մասնակցելու համար պետբուջեից հատկացվել էր 77 մլն դրամ: