Մադագասկարի ընդդիմության առաջնորդը իրեն հայտարարել է երկրի
նախագահ
18-03-2009 16:21:00 | Մադագասկար | Միջազգային
ԱՆՏԱՆԱՆԱՐԻՎՈՒ, 18 ՄԱՐՏԻ, ՆՈՅՅԱՆ ՏԱՊԱՆ: Մադագասկարի
ընդդիմության 34-ամյա առաջնորդ Էնդրյու Ռաջոյելինան զինվորական
հրամանատարության առաջնորդի կողմից լիազորություններն իրեն
փոխանցվելուց հետո իրեն հայտարարել է երկրի նախագահ:
«Ռավալոմանանան (Մադագասկարի նախկին նախագահը) հենց նոր
հրաժարական է տվել, ասել է թե նաեւ իր կառավարությունը եւ
վարչապետը, եւ, այդպիսով, ես անցումային կառավարության ղեկավարն
եմ... հիմա դուք կարող եք ինձ կոչել նախագահ»,- հեռախոսազրույցի
ժամանակ ֆրանսիական LCI հեռուստաալիքին հայտարարել է Էնդրյու
Ռաջոյելինան:
Ռաջոյելինան նշել է, որ նոր կառավարությունը, որ շուտով
կձեւավորվի, երկու տարվա ընթացքում երկրում կկազմակերպի
նախագահական ընտրություններ, եւ որ այդ ընտրություններում նա հույս
ունի ստանալ ժողովրդի աջակցությունը:
Քաղաքական ճգնաժամը Մադագասկարում ակտիվ փուլ մտավ հունվարին,
երբ նախագահին բռնապետության մեջ մեղադրող ընդդիմության առաջնորդ
Էնդրյու Ռաջոյելինայի կողմնակիցները Անտանանարիվուի կենտրոնական
հրապարակում հանրահավաք կազմակերպեցին, որը վերաճեց
անկարգությունների:
Մի քանի օր շարունակվող հուզումների զոհ դարձան մոտ 70 մարդ:
Ընդամենը ճգնաժամի սկզբից ի վեր ընդդիմության եւ անվտանգության
ուժերի բախումների հետեւանքով զոհվել է ավելի քան 135 մարդ: