ՎԱՇԻՆԳՏՈՆ, 12 ՄԱՐՏԻ, ՆՈՅՅԱՆ ՏԱՊԱՆ: ԱՄՆ-ի նախագահ Բարաք
Օբաման կառավարությանը կարգադրել է ուժի մեջ մտցնել Կուբայի հանդեպ
ԱՄՆ-ի տնտեսական պատժամիջոցները մեղմացնող օրենքը: Ավելի վաղ
օրինագիծն արժանացել էր Կոնգրեսի երկու պալատների հավանությանը:
Այս մասին հաղորդում է BBC-ն:
Համաձայն նորամուծությունների, կուբայական ծագումով
ամերիկացիները այժմ կարող են Կուբայում գտնվող իրենց հարազատներին
ուղարկել ավելի մեծ գումարներ, քան նախկինում: Մինչ օրս ԱՄՆ-ից
Կուբա դրամական փոխանցումների ծավալները սահմանափակ էին: Նշանակալի
չափով կվերացվեն նաեւ սննդամթերք եւ դեղորայք առաքելու
սահմանափակումները:
Դրանից բացի, կուբայական ծագումով ամերիկացիները այսուհետ
կկարողանան տարին մեկ անգամ մեկնել պատմական հայրենիք: Նախկինում
նրանց թույլատրվում էր Ազատության կղզի այցելել երեք տարին մեկ
անգամ` երկշաբաթյա ժամկետով: