Վարչապետի կարծիքով՝ Կառավարության բոլոր ծրագրերը շատ էական նշանակություն են ունենալու 7 տոկոս տնտեսական աճ ապահովելու համար
01-12-2022 15:08:52 | Հայաստան | Ի՞նչ է գրում մամուլը
2023 թվականի պետական բյուջեում հստակ ֆիքսվել է 7 տոկոս տնտեսական աճ ապահովելու Կառավարության հանձնառությունը: Ինչպես տեղեկացում է «Արմենպրես»-ը, դեկտեմբերի 1-ին Կառավարության նիստում այս մասին հայտարարեց վարչապետ Նիկոլ Փաշինյանը:
«Մեր բոլոր ծրագրերը շատ էական նշանակություն են ունենալու 7 տոկոս աճ ապահովելու համար, որովհետև ընկերություններից ահազանգ ենք ստանում, որ հենց իրենք մյուս տարվա իրենց պոտենցիալ աճի մեջ շատ լուրջ խնդիր են տեսնում, որ կարող է աշխատուժի բացակայության պատճառով չկարողանան տեմպը պահել», - ասաց նա։
Փաշինյանը հույս ունի, որ, ի հեճուկս գնաճի, մյուս տարի աղքատության ավելի ցածր ցուցանիշ կլինի։
«Սրա համար ի՞նչն է հիմք տալիս, առաջինը՝ աշխատատեղերի բացառիկ բարձր թիվը, աշխատավարձային ֆոնդի աննախադեպ թիվը, գործազրկության աննախադեպ ցածր մակարդակը ու մյուս տարվա պետական բյուջեի կապիտալ ծախսերի էական ավելացումը», - ընդգծեց վարչապետը։