Հունաստանում հանցագործները բանտից փախուստ են իրականացրել
ուղղաթիռով
23-02-2009 16:40:00 | Հունաստան | Միջազգային
ԱԹԵՆՔ, 23 ՓԵՏՐՎԱՐԻ, ՆՈՅՅԱՆ ՏԱՊԱՆ: Երկու հայտնի հանցագործներ
Աթենքի խիստ ռեժիմի «Կորիդալլոս» բանտից փախուստի են դիմել
ուղղաթիռով, հաղորդում է BBC-ն:
Ուղղաթիռը իջել է բանտի տանիքին, որից հետո Վասիլիս
Պալեոկոստասն ու Ալկետ Ռիցայը պարանասանդուղքով բարձրացել են
այնտեղ:
Հույն Պալեոկոստասը եւ իր մեղսակից ալբանացի Ռիցայը սպասում
էին դատավարության փախուստի համար, որ նրանք կատարել էին 2006
թվականի հունիսին:
Նրանք փախել էին նույն բանտից միեւնույն եղանակով` ուղղաթիռի
օգնությամբ, որը վայրէջք էր կատարել բանտի բակում, երբ
կալանավորները ֆիզիկական վարժություններ էին անում: Պահակախումբը
կարծել է, թե ուղղաթիռով հանձնաժողով է ժամանել` բանտում տեսչական
ստուգում կատարելու համար:
Վասիլիս Պալեոկոստասը բանտարկված էր մի քանի
հանցագործությունների համար, այդ թվում` գործարարի առեւանգման,
որին ազատ էր արձակել խոշոր փրկագնի դիմաց: Պալեոկոստասը
ձերբակալվել էր 2008 թվականի օգոստոսին: Բանտում է գտնվում նաեւ
նրա եղբայր Նիկոսը, որն էլ մշակել էր ուղղաթիռի օգնությամբ առաջին
փախուստի պլանը: