Իսրայելում սկսվել են խորհրդարանական ընտրությունները
10-02-2009 16:55:00 | Իսրայել | Միջազգային
ԹԵԼ ԱՎԻՎ, 10 ՓԵՏՐՎԱՐԻ, ՆՈՅՅԱՆ ՏԱՊԱՆ: Իսրայելում այսօր
սկսվել են 18-րդ գումարման Կնեսսետի (խորհրդարանի) արտահերթ
ընտրությունները: Ձայնի իրավունք ունեցող մոտ 5,3 մլն
իսրայելցիները կկարողանան իրենց քաղաքացիական պարտքը կատարել ավելի
քան 9 հազար ընտրական տեղամասերում տեղական ժամանակով 07.00-ից
մինչեւ 22.00:
Ընտրացուցակներում ընդգրկված են 34 կուսակցություններ եւ
ընտրական դաշինքներ, սակայն 2 տոկոսի ընտրազանգվածային շեմը
հաղթահարելու հույս կարող են ունենալ նրանցից առավելագույնը 15-ը:
Ըստ վերջին հարցումների, որ հրապարակվել են անցած ուրբաթ,
խորհրդարանում մոտ 25 տեղ կարող են հուսալ Բենիամին Նեթանյահուի
գլխավորած «Լիքուդ» կուսակցությունը եւ Ցիպի Լիվնիի գլխավորած
«Քադիման»: Երրորդ եւ չորրորդ տեղերը մոտավորապես 17 մանդատներով,
ինչպես սպասվում է, կկիսեն Ավիգդոր Լիբերմանի «Իսրայել` բեյթեյնու»
(«Մեր տունը Իսրայելն է») կուսակցությունը եւ «Ավոդան» Էհուդ
Բարաքի ղեկավարությամբ: Մնացած հավակնորդները խորհրդարանում
կզբաղեցնեն 2-6-ական տեղ եւ չեն կարող կառավարության մեջ մտնելու
հույս ունենալ: