ՆՅՈՒ ՅՈՐՔ, 5 ՓԵՏՐՎԱՐԻ, ՆՈՅՅԱՆ ՏԱՊԱՆ: Պակիստանի ժողովրդական կուսակցության առաջնորդ Բենազիր Բհուտոյի սպանության հանգամանքների հետաքննությամբ կզբաղվի ՄԱԿ-ի հովանու ներքո հատուկ ստեղծված անկախ միջազգային հանձնաժողովը: Այս մասին հայտարարել է ՄԱԿ-ի գլխավոր քարտուղար Պան Գի Մունը: «Այդ հանցագործությունը խորապես ցնցեց ողջ աշխարհը: Այդ պատճառով ես հայտարարում եմ անկախ միջազգային հանձնաժողովի ձեւավորման մասին, որը կգլխավորի հասարակության աչքի ընկնող ներկայացուցիչներից մեկը»,- հայտարարել է Պան Գի Մունը` միաժամանակ ձեռնպահ մնալով այդ մարդու կոնկրետ անունը հիշատակելուց: Բենազիր Բհուտոն զոհվել էր 2007 թվականի դեկտեմբերին ահաբեկչության հետեւանքով: Մինչ օրս պարզ չէ, թե ովքեր են եղել Պակիստանի պատմության մեջ այդ ամենաաղմկահարույց ահաբեկչական գործողություններից մեկի պատվիրատուն եւ կատարողները:

---