«Կոմերսանտ». ՌԴ-ն Ղրղզստանի պարտքը չեղյալ կանի ԱՄՆ-ի
ռազմակայանի ոչնչացման փոխարեն
03-02-2009 16:36:00 | Ռուսաստան | Միջազգային
ՄՈՍԿՎԱ, 3 ՓԵՏՐՎԱՐԻ, ՆՈՅՅԱՆ ՏԱՊԱՆ: Ռուսաստանը պատրաստ է
Ղրղզստանին ֆինանսական օգնություն տրամադրել ղրղզական տարածքում
գտնվող ամերիկյան «Մանաս» ռազմակայանի վերացման դիմաց, գրում է
«Կոմերսանտ» թերթը:
Ռուսաստանի նախագահ Դմիտրի Մեդվեդեւի հետ
բանակցություններում, որ պետք է կայանան այսօր Մոսկվայում,
Ղրղզստանի նախագահ Կուրմանբեկ Բաքիեւը կարող է իր բոլոր ֆինանսական
խնդրանքների բավարարման հույս ունենալ, նախ եւ առաջ Բիշքեկին 450
մլն դոլարի ֆինանսական օգնություն տրամադրելու եւ Ռուսաստանի
հանդեպ 180 մլն դոլարի ղրղզական պարտքի դուրս գրման հարցում:
Ի պատասխան Մոսկվան Ղրղզստանի տարածքի «Մանաս» ամերիկյան
ռազմական բազայի ճակատագրի բարենպաստ լուծում է հաշվարկում. բազայի
փակման մասին որոշումը երկրի խորհրդարանը կարող է ընդունել արդեն
այսօր: