Բնունիս երկու ադրբեջանցիներ են մտել, մեկին բռնել են, մյուսին փնտրում են․ Սիսիան համայնքի ղեկավար
10-04-2023 14:03:16 | Հայաստան | Ի՞նչ է գրում մամուլը
Սիսիանի Բնունիս գյուղ մտած ադրբեջանցիները երկուսն են՝ մեկին գյուղի ժողովուրդը բռնել է, մյուսին դեռ չեն հայտնաբերել, «Ազատությանը» փոխանցեց Սիսիան համայնքի ղեկավար Արմեն Հակոբջանյանը՝ նշելով՝ մյուսին փնտրում են։
Բռնված ադրբեջանցին, ըստ Հակոբջանյանի, սկզբում Բնունիսում է եղել, բայց հայտնաբերվել է Աշոտավան գյուղի փողոցում։
Համայնքապետն այլ հարցերի չպատասխանեց, միայն ասաց, որ ադրբեջանցին քաղաքացիական հագուստով է եղել։
Բնունիս համայնքի ղեկավար Գոռ Հովհաննիսյանը վստահեցրեց, որ գյուղում այժմ ամեն ինչ նորմալ է, «խուճապ չկա»։
Թե ինչպես են ադրբեջանցիները կարողացել մտնել համայնքի բնակչի տուն, Հովհաննիսյանը հրաժարվեց մանրամասնել՝ հորդորելով դիմել համապատասխան մարմիններին։ Նա ամեն դեպքում վստահեցրեց, որ ադրբեջանցիները գյուղում լինել չեն կարող։ Ըստ Բնունիսի համայնքապետի՝ ադրբեջանական դիրքերը հեռու են իրենց գյուղից։
Ավելի ուշ Պաշտպանության նախարարությունը հաղորդեց, որ այսօր ժամը 01:00-02:00-ն ընկած ժամանակահատվածում, Հայաստանի տարածքում հայտնաբերվել և ձերբակալվել է Ադրբեջանի ԶՈՒ զինծառայող: Վկայակոչելով վերջինիս՝ ՊՆ-ն նշում է, որ նրա հետ ևս մեկ զինծառայող է եղել, որի որոնողական աշխատանքները շարունակվում են:
Այսօր Բաքուն հաղորդել էր, որ Նախիջևանի Շահբուզ շրջանի ուղղությամբ ադրբեջանցի երկու զինծառայողներ են մոլորվել՝ «անբարենպաստ եղանակային և սահմանափակ տեսանելիության պայմաններում»։ Նշված շրջանը գտնվում է Հայաստանի հետ սահմանին։
ՀԱՅԵՐԵՆ
Русский
English
Դաս. հայերեն
French
