«Չենք տալու, կապեն մեջքներին, գնան խանութ. Արմեն Խաչատրյանը հայտնեց՝ Տեղ գյուղի բնակիչներին որ դեպքում զենք կտրամադրվի
19-04-2023 13:46:55 | Հայաստան | Ի՞նչ է գրում մամուլը
Հայկական ժամանակ. «Իմ կարծիքով՝ Տեղ համայնքը ամենալավ պատրաստված գյուղն է ՀՀ-ում»:
Այս մասին այսօր ԱԺ-ում լրագրողների հետ զրույցում ասաց «Քաղաքացիական պայմանագիր» խմբակցության ԱԺ պատգամավոր Արմեն Խաչատրյանը:
«Համայնքում կա զինանոց, ամեն ինչ, և յուրաքանչյուր տղամարդ գիտի՝ ինչ է անելու որոշակի պատերազմական իրավիճակի ժամանակ: Սա վերջին երկու տարվա մեջ է ստեղծվել, և Տեղ գյուղի օրինակը պետք է վերցնեն նաև մյուս գյուղերը»,- նշեց Խաչատրյանը:
Ըստ նրա, սակայն, զենքը չի տրամադրվում խաղաղ իրավիճակում, որ կապեն մեջքներին, գնան խանութ. «Երբ կարիքն առաջանա, ցանկացած գյուղացի գիտի, թե իր զենքը որտեղ է գտնվում»:
Պատգամավորը նշեց, որ սահմանը պաշտպանում է կա՛մ սահմանապահ զորքը, կա՛մ մեր Զինված ուժերը: Գյուղացին սահման չի պաշտպանում կամ պաշտպանում է՝ անցնելով պայմանագրային ծառայության:
Հարցին՝ ճի՞շտ է, որ Տեղ գյուղում անցակետեր են տեղադրվելու Ադրբեջանի պահանջով, Արմեն Խաչատրյանը պատասխանեց, որ առաջին անգամ է լսում նման բան. «Տեղ գյուղից դեպի համապատասխան սահմանային գոտի գնալու համար, անվտանգությունից ելնելով, կա ոստիկանական սահմանակետ, Ադրբեջանն ինչ գործ ունի խառնվի, թե մենք որտեղ և ինչու ենք անցակետ դնում»: