Լաչինի մինջանցքի՝ Ադրբեջանի կողմից ապօրինի փակված անցակետում երկրի դրոշն է տեղադրվել
26-04-2023 16:00:18 | Հայաստան | Ի՞նչ է գրում մամուլը
Հայկական ժամանակ. Լաչինի նոր ճանապարհի մուտքի մոտ՝ Ադրբեջանի կողմից անօրինական տեղադրված անցակետում, տեղի է ունեցել Ադրբեջանի դրոշի բարձրացման արարողություն։ Ադրբեջանական լրատվամիջոցների փոխանցմամբ՝ այս մասին զեկույց է տրվել նախագահ Իլհամ Ալիևին։
Դրոշի բարձրացումը տեղի է ունեցել պետական արարողակարգով, հատուկ զինվորական ուղեկցությամբ:
Հիշեցնենք՝ օրերս Ադրբեջանը պաշտոնապես հայտարարել է Լաչինի միջանցքի մուտքի մոտ, որը գտնվում է ՌԴ խաղաղապահ զորախմբի վերահսկողության ներքո, ստուգիչ անցագրային կետի տեղակայման մասին։ Անցակետի տեղադրումն այդ հատվածում Ադրբեջանը հիմնավորում է հերթական ապատեղեկատվությամբ, իբրև թե նպատակ ունեն «կանխելու Հայաստանից Արցախ ապօրինի զենքի տեղափոխումը»։
2020 թվականի նոյեմբերի 9-ի եռակողմ հայտարարության որևէ դրույթով նշված չէ այդ հատվածում անցակետ տեղադրելու մասին։
Արձագանքելով Ադրբեջանի սադրիչ գործողություններին՝ ՀՀ ԱԳՆ-ն կոչ է արել ՌԴ-ին ի վերջո կատարել եռակողմ հայտարարության 6-րդ կետով ստանձնած պարտավորությունը՝ վերացնել միջանցքի ապօրինի արգելափակումը և ապահովել ադրբեջանական ուժերի դուրսբերումը Լաչինի միջանցքից՝ ողջ անվտանգության գոտուց:
Իսկ ՌԴ ՊՆ-ն «միակողմանի և չհամաձայնեցված» է որակել Ադրբեջանի վերջին գործողությունները Լաչինի միջանցքում:
Նշենք, որ սույն հարցով Հայաստանը դիմել է ՄԱԿ-ի Արդարադատության միջազգային դատարան:
ՀԱՅԵՐԵՆ
Русский
English
Դաս. հայերեն
French
