ՕՊԵԿ-ը ենթադրում է նավթի արդյունահանման նոր կրճատում
29-01-2009 15:10:00 | Շվեյցարիա | Միջազգային
ԴԱՎՈՍ, 29 ՀՈՒՆՎԱՐԻ, ՆՈՅՅԱՆ ՏԱՊԱՆ: ՕՊԵԿ-ի գլխավոր քարտուղար
Աբդալլա ալ-Բադրին չի բացառում նավթի արդյունահանման նոր կրճատման
հնարավորությունը կազմակերպության անդամ երկրների կողմից` նավթի
համաշխարհային շուկայի կայունությունը վերականգնելու նպատակով: Նա
«չափազանց ցածր» է համարում անգամ նավթի մեկ բարելի 50 դոլար
արժեքը:
Ներկայումս գտնվելով Դավոսի տնտեսական համաժողովում` Աբդալլա
ալ-Բադրին Al-Sharq Al-Awsat թերթի հետ զրույցի ժամանակ ասել է, որ
ՕՊԵԿ-ը, որն արդեն նավթի հանույթը անցած տարվա սեպտեմբերից սկսած
կրճատել է օրական 4,2 մլն. բարելով, այդ թվում 2 մլն. բարելով
ՕՊԵԿ-ի Ալժիրում կայացած վերջին համաժողովում, «եւս մեկ անգամ եւ
առանց տատանվելու նոր որոշումներ կընդունի համաշխարհային շուկայում
կայունությունը վերականգնելու համար»:
«Նավթի մեկ բարելի արժեքի մինչեւ 50 դոլար աճի դեպքում անգամ
այդ գինը անչափ ցածր կլինի: Այն չի խթանում (նավթ արտադրողներին)
մեծացնելու կապիտալ ներդրումները (նավթի ոլորտում)»,- ասել է
ՕՊԵԿ-ի գլխավոր քարտուղարը: