Ադրբեջանցի կեղծ բնապահպանները կդադարեցնեն «բողոքի ցույց»-ն ու երեկոյան կազատեն Լաչինի ճանապարհը
28-04-2023 18:45:16 | Արցախ (ԼՂՀ) | Ի՞նչ է գրում մամուլը
armtimes.com Ադրբեջանցի էկոակտիվիստները այսօր երեկոյան կդադարեցնեն շինծու բողոքի ցույցը, որի պատճառով նախորդ տարվա դեկտեմբերի 12-ից փակ են պահում Ղարաբաղի տանող միակ ավտոճանապարհը՝ Լաչինի միջանցքը:
Ակցիան դադարեցնելու և դրա անցկացման վայրից հեռանալու մասին հայտնում է AZERTAC պետական լրատվական գործակալությունը։
Նշվում է, որ որոշումն ընդունվել է մի խումբ ցուցարարների հանդիպումից հետո Ադրբեջանի իշխանությունների ներկայացուցիչների հետ, ովքեր առաջարկել են դադարեցնել բողոքի ակցիաները՝ կապված Լաչինում անցակետի տեղադրումից հետո նոր իրավիճակի ստեղծման հետ:
«Հաշվի առնելով մեր պահանջների մասնակի կատարումը, ինչպես նաև պետության ներկայացուցիչների բազմաթիվ կոչերը՝ մենք՝ էկոակտիվիստներս և երիտասարդ կամավորները, որոշեցինք ժամանակավորապես դադարեցնել բողոքի ակցիան ապրիլի 28-ից՝ ժամը 18:00-ից»,- ասված է ակցիայի մասնակիցների տարածած հայտարարության մեջ:
Հիշեցնենք՝ ադրբեջանական կեղծ բնապահպանական ակցիաների պատճառով արդեն 5 ամիս է՝ փակ է Ղարաբաղն ու Հայաստանը կապող միակ ավտոճանապարհը՝ Լաչինի միջանցքը: Բազմաթիվ փաստերով քանիցս ապացուցվել է, որ Ադրբեջանը ոչ թե Ղարաբաղում գործող հանքերում առկա խնդիրների դեմ է պայքարում, ինչպես հայտարարվել է, այլ ընդամենը փակ է պահում ճանապարհը, քանի որ Արցախում գործող բոլոր հանքերն աշխատում են սահմանված չափանիշներին համապատասխան:
Փակ ճանապարհի պատճառով ամիսներ շարունակ Արցախի շուրջ 120 հազար բնակչությունը, այդ թվում՝ երեխաներ ու տարեցներ, զրկված են տեղաշարժի ազատությունից, Արցախ սնունդ ու դեղորայք հասցնելը մեծ խնդիրներով է ուղեկցվում: Արցախում տևական ժամանակ սննդի որոշ տեսակների, բանջարեղենի ու մրգերի, մանկական կերերի ու դեղորայքի դեֆիցիտ է:
Բացի այդ՝ օրերս Ադրբեջանը պաշտոնապես հայտարարել է Լաչինի միջանցքի մուտքի մոտ, որը գտնվում է ՌԴ խաղաղապահ զորախմբի վերահսկողության ներքո, ստուգիչ անցագրային կետի տեղակայման մասին։ Անցակետի տեղադրումն այդ հատվածում Ադրբեջանը հիմնավորում է հերթական ապատեղեկատվությամբ, իբրև թե նպատակ ունեն «կանխելու Հայաստանից Արցախ ապօրինի զենքի տեղափոխումը»։
2020 թվականի նոյեմբերի 9-ի եռակողմ հայտարարության որևէ դրույթով նշված չէ այդ հատվածում անցակետ տեղադրելու մասին։
Սույն հարցով Հայաստանը դիմել է ՄԱԿ-ի Արդարադատության միջազգային դատարան:
ՀԱՅԵՐԵՆ
Русский
English
Դաս. հայերեն
French
