ՎԱՇԻՆԳՏՈՆ, 27 ՀՈՒՆՎԱՐԻ, ՆՈՅՅԱՆ ՏԱՊԱՆ: Հարավային
Կալիֆոռնիայի բնակչուհին դարձել է աշխարհում երկրորդ կինը, որը
միանգամից ութ առողջ երեխա է ծննդաբերել:
Ըստ կլինիկայի բժիշկների, բոլոր նորածինները` վեց տղա եւ
երկու աղջիկ, ծնվել են 820 գրամից մինչեւ մեկուկես կիլոգրամ քաշով:
«Դա պարզապես զարմանալի է: Բոլոր ութ երեխաներն էլ իրենց
միանգամայն նորմալ են զգում»,- ասում է բժիշկ Քարեն Մեյփլսը:
Համաշխարհային բժշկագիտության մեջ առաջին անգամ ութ երեխա է
ծնվել 1998 թվականին ամերիկյան Հյուստոն քաղաքի հիվանդանոցում: Այդ
ժամանակ վեց աղջիկ եւ երկու տղա էր ունեցել 27-ամյա Նկեմ Չուկվուն`
նիգերիացի գաղթականի կինը: Երեխաներից մեկը մեկ շաբաթ անց
վախճանվել էր, իսկ մնացած յոթը անցած դեկտեմբերին միասին նշեցին
իրենց տասնամյակը: