Ռուսաստանը լրջորեն է վերաբերում Հայաստանի նկատմամբ դաշնակցային պարտավորություններին․ դեսպան
09-05-2023 11:23:21 | Հայաստան | Ի՞նչ է գրում մամուլը
Ռուսաստանը ջանքեր է գործադրում, որպեսզի կյանքի կոչվեն Հայաստանի և Ադրբեջանի ղեկավարների հետ ձեռք բերված պայմանավորվածությունները։ «Արմենպրես»-ի փոխանցմամբ, այս մասին «Հաղթանակի» զբոսայգում լրագրողների հետ ճեպազրույցում ասաց Հայաստանում Ռուսաստանի դեսպան Սերգեյ Կոպիրկինը։
Դեսպանի համոզմամբ՝ ռուսական կողմն ակտիվ ջանքեր է գործադրում, որպեսզի հայ-ադրբեջանական հարաբերությունների կարգավորման գործըթնացում առաջընթաց գրանցվի։
«Հենց այդտեղ ենք տեսնում երաշխիքները, որ էսկալացիաներ չեն լինի և կողմերը կգան համաձայնության, որը կբխի Հարավային Կովկասի բոլոր երկրների ու ժողովուրդների շահերից։
Մենք մշտապես շփման մեջ ենք գտնվում կողմերի հետ, ակտիվորեն առաջ ենք մղում խաղաղության օրակարգը, միջնորդական ծառայություններ ենք մատուցում»,- ասաց Կոպիրկինը։
ՌԴ դեսպանի պնդմամբ՝ այսօր Լեռնային Ղարաբաղում գտնվող ռուսական խաղաղապահ կոնտինգենտը լուծում է իր առջև դրված խնդիրները՝ նպաստելու համար իրադրության կարգավորմանը, այդ թվում և Լաչինի միջանցքի բացմանը։ Դիվանագետն ընդգծեց, որ ռուսական կողմը ջանք չի խնայում՝ խթան հաղորդելու հայ-ադրբեջանական հարաբերությունների կարգավորման գործընթացին տարբեր ձևաչափերում՝ այդ թվում և տարածաշրջանի տնտեսական և տրանսպորտային հաղորդակցման ուղիների ապաշրջափակման հարցերով զբաղվող աշխատանքային խմբի շրջանակում, խաղաղության պայմանագրի կնքման, սահմանների դելիմիտացիայի ուղղությամբ տարվող աշխատանքներում։
«ՌԴ-ն բազմիցս ասել է և կրկնում է հաստատակամորեն, որ մենք պատրաստ ենք խորհրդատվական աջակցություն ցուցաբերել այս հարցում։ Մենք նաև հանդես ենք գալիս հասարությունների միջև երկխոսության ակտիվացման օգտին
Աշխատանքը մշտապես տեղի է ունենում, մենք կողմերի հետ մշտական շփման մեջ ենք և հուսով ենք, որ այդ ջանքերը կտան արդյունքներ»,- ընդգծեց դեսպանը։
Կոպիրկինը հավաստիացրեց, որ Ռուսաստանը շատ լրջորեն է վերաբերվում այն ամենին, ինչ տեղի է ունենում Հայաստանում։
«Ռուսաստանը լրջորեն է վերաբերում այն ամենին, ինչ վերաբերում է Հայաստանի նկատմամբ դաշնակցային իր պարտավորություններին և ձեռնարկում է բոլոր հնարավոր ջանքերը, որ այստեղ հաստատվի խաղաղության, անվտանգության, զարգացման դարաշրջանը»,- հայտարարեց ՌԴ դեսպանը։
ՀԱՅԵՐԵՆ
Русский
English
Դաս. հայերեն
French
