Ալիևը շտապել է շնորհավորել Էրդողանին, թեպետ վերջինս չի հաղթահարել 50 տոկոսի շեմը
15-05-2023 12:24:51 | Հայաստան | Ի՞նչ է գրում մամուլը
Հայկական ժամանակ. Ադրբեջանի նախագահ Իլհամ Ալիևը այսօր՝ մայիսի 15-ին, զանգահարել է Թուրքիայի նախագահ Ռեջեփ Թայիփ Էրդողանին, հայտնում է Ադրբեջանի նախագահի մամուլի ծառայությունը։
Երկրի ղեկավարը շնորհավորել է նախագահ Էրդողանին և Հանրապետական միությանը Թուրքիայի նախագահական և խորհրդարանական ընտրություններում ձայների մեծամասնություն ստանալու կապակցությամբ։
Հատկանշական է, որ քվեաթերթիկների 100%-ն արդեն հաշվարկված է, բայց Էրդողանին չի հաջողվել հաղթահարել ընտրվելու համար անհրաժեշտ 50 տոկոսի շեմը, իսկ Ալիևը շնորհավորել է նրան:
Նա նշել է, որ «Ռեջեփ Թայիփ Էրդողանի ղեկավարությամբ Թուրքիայի Հանրապետությունը զարգացման երկար ճանապարհ է անցել, և որպես դրա դրսևորում եղբայրական թուրք ժողովուրդը վստահություն է ցուցաբերել իր առաջնորդի նկատմամբ նաև այս ընտրություններում»։
Թուրքիայի նախագահ Ռեջեփ Թայիփ Էրդողանը շնորհակալություն է հայտնել Ալիևին ուշադրության և շնորհավորանքների համար։
Ինչպես հայտնել ենք, նախագահի համար հիմնական պայքարը ծավալվում է հանրապետության ներկայիս ղեկավարի՝ «Հանրապետական դաշինքի» միասնական թեկնածու 69-ամյա Ռեջեփ Թայիփ Էրդողանի և ընդդիմադիր «Ժողովրդական դաշինքի» միասնական թեկնածու 74-ամյա Քեմալ Քըլըչդարօղլուի միջև։
Ընտրություններին մասնակցում է նաև 55-ամյա Սինան Օգանը ընդդիմադիր «Աթա» կոալիցիայից (Աթաթուրքի կոալիցիա)։
Չորրորդ թեկնածուն՝ «Մեմլեքեթ» կուսակցության առաջնորդ Մուհարեմ Ինջեն, ընտրություններից երեք օր առաջ հայտարարեց իր թեկնածությունից հրաժարվելու մասին: