Ադրբեջանը շարունակում է էսկալացիոն քաղաքականություն վարել. Փաշինյան
18-05-2023 15:59:27 | Հայաստան | Ի՞նչ է գրում մամուլը
Sputnik. ՀՀ վարչապետը շեշտեց զորքերի հետքաշման ու ՀՀ սահմանին և ԼՂ–ում միջազգային ներկայության անհրաժեշտությունը։
Ի հեճուկս բանակցություններում գրանցված որոշակի առաջընթացի, Ադրբեջանը շարունակում է էսկալացիոն քաղաքականություն վարել Հայաստանի հետ սահմանին։ Այսօր ՀՀ կառավարության նիստում այս հայտարարությունն արեց վարչապետ Նիկոլ Փաշինյանը` արձանագրելով, որ վերջին օրերին ՀՀ սահմանին հնչել են կրակոցներ, կան զոհեր։
«Գլուխ խոնարհելով մեր ընկած եղբայրների առաջ` կրկին ուզում եմ ընդգծել, որ առավել ևս մայիսի 14-ի պայմանավորվածությունների ֆոնին ավելի հրատապ է դառնում սահմանային գծից զորքերի հայելային հետքաշումը և սահմանագծի ապառազմականացումը։ Եվ մենք այս օրակարգը շարունակելու ենք ընդգծել»,– ասաց Փաշինյանը։
Նրա խոսքով` Ադրբեջանի էսկալացիոն քաղաքականության ևս մեկ դրսևորում է Լաչինի միջանցքի ապօրինի արգելափակումը, որը, վարչապետի գնահատմամբ, ևս մեկ անգամ ակներև է դարձնում ԼՂ–ում ու Լաչինի միջանցքում միջազգային ներկայության լեգիտիմ անհրաժեշտությունը։
«Մենք այս թեման քննարկում ենք մեր բոլոր միջազգային գործընկերների հետ»,– հայտնեց վարչապետը։
Հիշեցնենք` մայիսի 17-ին` ժամը 16:15-ի սահմաններում, Ադրբեջանի ԶՈւ ստորաբաժանումները կրակ էին բացել Սոթքի հատվածում տեղակայված հայկական դիրքի ուղղությամբ, ինչի հետևանքով վիրավորում էր ստացել ՀՀ ՊՆ զինծառայող։
Այնուհետև Ադրբեջանի ԶՈւ ստորաբաժանումները կրակ էին բացել վիրավոր զինծառայողին տեղափոխող շտապօգնության մեքենայի ուղղությամբ, ինչի հետևանքով վիրավորում էր ստացել նաև բուժակը:
Ավելի ուշ ՊՆ-ն հայտնեց, որ Ադրբեջանի ԶՈւ բացած կրակի հետևանքով կյանքի հետ անհամատեղելի հրազենային վնասվածքներ ստացած զինծառայողը մահացել է:
ՀԱՅԵՐԵՆ
Русский
English
Դաս. հայերեն
French
