ՆԱՏՕ-ի նոր գլխավոր քարտուղար կարող է լինել Դանիայի
վարչապետը կամ Լեհաստանի ԱԳՆ ղեկավարը
19-01-2009 19:20:00 | Բելգիա | Միջազգային
ԲՐՅՈՒՍԵԼ, 19 ՀՈՒՆՎԱՐԻ, ՆՈՅՅԱՆ ՏԱՊԱՆ: ՆԱՏՕ-ի գլխավոր
քարտուղարի պաշտոնի առավել հավանական թեկնածուներ են Դանիայի
ներկայիս վարչապետ Անդերս Ֆոգ Ռասմուսսենը եւ Լեհաստանի ԱԳՆ
ղեկավար Ռադոսլավ Սիկորսկին, գրում է Soir թերթը:
Հուլիսի 31-ին լրանում է ՆԱՏՕ-ի ներկայիս ղեկավար, հոլանդացի
Յաապ դե Հոոպ Սխեֆերի լիազորությունների ժամկետը, որը պաշտոնը
ստանձնել էր 2004 թվականի հունվարին:
Պարբերականի կարծիքով, ՆԱՏՕ-ի նոր գլխավոր քարտուղարը
դառնալու ավելի մեծ հնարավորություններ ունի Դանիայի վարչապետը. նա
իր հավանական մրցակցից առաջ է ֆրանսերենի իր իմացությամբ, որը
ՆԱՏՕ-ի երկրորդ պաշտոնական լեզուն է անգլերենից հետո:
Հենց Ֆրանսիան է պնդում, որպեսզի Հյուսիսատլանտյան դաշինքի
ղեկավարը ազատորեն տիրապետի «Մոլիերի լեզվին», գրում է թերթը: