Փարիզի քաղաքապետը Հայաստան է գալիս` Արցախի համար հումանիտար բեռներն ուղեկցելու
29-08-2023 14:07:47 | Հայաստան | Ի՞նչ է գրում մամուլը
Sputnik. Հումանիտար օգնություն ենտրամադրել ոչ միայն Փարիզը, այլև Ֆրանսիայի տարբեր երկրամասեր։
Փարիզի քաղաքապետ Ան Իդալգոն դիմել է Ֆրանսիայի տարածքային մարմիններին՝ 2022 թվականի դեկտեմբերի 12-ից աշխարհից կտրված Արցախ մարդասիրական ավտոշարասյուն հասցնելը կազմակերպելու կոչով: X–ի (նախկինում` Twitter) էջում այս մասին հայտնել է Ֆրանսիայի հայկական կազմակերպությունների համակարգող խորհուրդը` նշելով` իրենք են նման խնդրանքով դիմել քաղաքապետին։
Նշվում է, որ Ան Իդալգոն օգոստոսի 30-ին Հայաստան կժամանի ուղարկվող հումանիտար օգնությունն անձամբ ուղեկցելու համար։
Ըստ հաշվարկների` ավտոշարասյունը կհասնի Լաչինի միջանցք օգոստոսի 30-ին` ժամը 12-ին:
Հումանիտար օգնությունը Լեռնային Ղարաբաղի համար հավաքել են ոչ միայն Փարիզ քաղաքը, այլև Ֆրանսիայի մի շարք շրջաններ, մասնավորաբար` Իլ դը Ֆրանսը, Օվերն-Ռոն-Ալպը, Օքսիտանիա Պրովենս Ալպ կոտ դը Ազուրը, Օ դը Ֆրանսը, Պեյս դե լա Լուարը։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։
Հուլիսի 26-ին առաջին անհրաժեշտության շուրջ 400 տոննա ապրանքով բեռնված 19 բեռնատար Երևանից ուղևորվեցին շրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։ Եվս մեկ կցորդիչով բեռնատար ուղարկել էին ֆրանսիական տեղական ինքնակառավարման մարմնները։ Այնուհետև քաղցրավենիքով լի մեկ բեռնատար էլ ուղարկել էր «Գրանդ Քենդի» ընկերությունը։
ՀԱՅԵՐԵՆ
Русский
English
Դաս. հայերեն
French
