Ինչպես է Կրեմլը ուղղորդում պետական լրատվամիջոցներին լուսաբանել ԼՂ-ի իրադարձությունները. ինչ է ձեռք բերել Meduza-ն
20-09-2023 19:05:21 | Ռուսաստան | Ի՞նչ է գրում մամուլը
armtimes.com Meduza լրատվականի ձեռքի տակ է հայտնվել մեթոդական մի ձեռնարկ, որը սեպտեմբերի 19-ի երեկոյան ՌԴ նախագահի վարչակազմն ուղարկել է պետական և Կրեմլին հավատարիմ լրատվամիջոցների աշխատակիցներին։
Այդ ձեռնարկում Կրեմլը ուղղորդում պետական լրատվամիջոցներին՝ թե ինչպես լուսաբանել իրադարձությունները Ղարաբաղում։ Մասնավորապես խորհուրդ է տալիս Լեռնային Ղարաբաղում հակամարտության սրման մեջ մեղադրել Հայաստանին և արևմտյան երկրներին՝ շեշտը դնելով այն փաստի վրա, որ «Հայաստանի ղեկավարությունը ճանաչեց Ադրբեջանի ինքնիշխանությունը Ղարաբաղի նկատմամբ», և որպես այս թեզի հաստատում մեջբերել Հայաստանի վարչապետ Նիկոլ Փաշինյանի՝ 2022 թվականի հոկտեմբերին արած հայտարարությունները։
Ձեռնարկի տեքստում ասված է.
«Ամենայն հավանականությամբ, Հայաստանի վարչապետին այս հայտարարությանը դրդել են արևմտյան «գործընկերները», որոնք պետք է ամբողջությամբ կիսեն նրա հետ հետևանքների պատասխանատվությունը։ Հայաստանի ղեկավարության որոշումը, որն ինքնին արմատապես փոխեց Ղարաբաղի կարգավիճակը, ազդանշան դարձավ Ադրբեջանի գործելու համար, և այժմ Բաքուն Լեռնային Ղարաբաղի հակամարտությունն ընկալում է որպես իր սեփականը, որպես ներքին գործ»։
Կրեմլը խորհուրդ է տալիս ռուս խաղաղապահների կարգավիճակը բնութագրել որպես «դիտարկող», մինչդեռ կառավարամետ լրատվամիջոցների աշխատակիցներին պետք է պատմել «քաղաքացիներին տարհանելու» հարցում խաղաղապահների օգնության մասին։ Ձեռնարկը կազմողները առանձին-առանձին խորհուրդ են տալիս նշել, որ մարդիկ «ապաստան» են գտնում ուղղափառ եկեղեցում, որը գտնվում է ռուսական խաղաղապահ զորախմբի բազայի տարածքում:
Meduza-ն նշում է, որ Կրեմլի այս թեզերն արդեն հայտնվել են «Կոմսոմոլսկայա պրավդա»-ի նյութում։ «ՀՀ վարչապետ Նիկոլ Փաշինյանը համաձայն է, որ Ղարաբաղը Ադրբեջան է»։
«Հայ ժողովուրդը կցանկանար, որ Ղարաբաղում խաղաղություն լինի, իսկ Հայաստանում՝ բարգավաճում։ Երևանի իշխանությունը, դատելով իր քաղաքական քայլերից, երազում է ազատվել Ղարաբաղից՝ որպես ավելորդ բեռ և նավարկել դեպի Արևմուտք»,- գրում է «Կոմսոմոլսկայա պրավդա»-ն։
«Լենտա.ռու»-ի հոդվածում ասվում է, որ «ղարաբաղյան հիմնախնդիրն, ըստ էության, դառնում է Ադրբեջանի ներքին խնդիր»։
ՀԱՅԵՐԵՆ
Русский
English
Դաս. հայերեն
French
