Հուսով ենք` մեր ազդանշանները լսելի կլինեն Երևանին և կընկալվեն պատշաճ կերպով. ՌԴ ԱԳՆ խոսնակ

27-09-2023 14:00:07 | Հայաստան | Ի՞նչ է գրում մամուլը

Sputnik. Մոսկվան հույս ունի, որ իր մեսիջները լսելի կլինեն և կընկալվեն պատշաճ ձևով։

Ռուսաստանը միշտ խնամքով է վերաբերվել Հայաստանի հետ դաշնակցային հարաբերություններին։ Այս մասին ՌԴ ԱԳՆ ներկայացուցիչ Մարիա Զախարովան ասել է` մեկնաբանելով ՀՀ վարչապետ Նիկոլ Փաշինյանի ուղերձի վերաբերյալ ՌԴ ԱԳՆ–ի պատասխանը։

Դիվանագետից հետաքրքրվել են, թե արդյոք Երևանը լսել է սեպտեմբերի 25-ի հայտարարության մեջ շարադրված Մոսկվայի մեսիջները։

Զախարովան նշել է, որ հայկական կողմի հետ շփումները շարունակվում են տարբեր մակարդակներով։

«Հուսով ենք, որ մեր ազդանշանները լսելի կլինեն և կընկալվեն պատշաճ կերպով։ Մեծամասամբ դա մեր պատասխան արձագանքն էր», – ասել է նա։

Ռուսաստանը միշտ խնամքով է վերաբերվել Հայաստանի հետ դաշնակցային հարաբերություններին, դրանց սրացման նախաձեռնողը չի եղել, արել է ամեն բան հայ ժողովրդի բարեկեցության համար, այդպես կլինի նաև հետագայում։ ՌԴ–ն հույս ունի, որ երկկողմանի բոլոր պայմանավորվածությունները կկատարվեն` ելնելով երկու երկրների ժողովուրդների շահերից։

Նախորդ կիրակի ժողովրդին ուղղված իր ուղերձում ՀՀ վարչապետը հայտարարել էր հանրապետության արտաքին և ներքին անվտանգության գործիքները փոխելու և լրացնելու անհրաժեշտության մասին։ Նա նշել է, որ Ադրբեջանի հարձակումները ՀՀ–ի վրա հանգեցնում են նրան, որ արտաքին անվտանգության համակարգերը, որում երկար տարիներ ներգրավված է եղել երկիրը, անարդյունավետ են պետական շահերի և անվտանգության համար։

Ավելի ուշ ՌԴ ԱԳՆ–ն հանդես եկավ հայտարարությամբ` Փաշինյանի ուղերձում հնչած պնդումները որակելով որպես ՌԴ–ի հասցեին ուղղված անընդունելի ելույթ։ Ռուսական կողմը կարծում է` ակնհայտ է, որ փորձ է արվում վերացնել ներքին ու արտաքին քաղաքականության մեջ ձախողումների պատասխանատվությունը՝ մեղքը բարդելով Մոսկվայի վրա։

Նոյյան տապան - Ի՞նչ է գրում մամուլը