Հայկական ժամանակ. «Այս իրավիճակում երկրորդ փուլ թույլ տալ չի կարելի. երբ ադրբեջանական զորքը կանգնած է Երասխի մոտ, երբ 100 հազար փախստական լցվել է Հայաստան, եւ յուրաքանչյուր կոպեկը կարեւոր է»:

 

Այս մասին հայտարարել է «Հանրային ձայն» կուսակցության ղեկավար Վարդան Ղուկասյանը՝ արձագանքելով Երևանի նախկին քաղաքապետ, «Ազգային առաջընթաց» կուսակցության քաղաքապետի թեկնածու Հայկ Մարությանի առաջարկներին: 

 

«Երկրորդ փուլ թույլ տալ, որ ընկնել քուչա-քուչա քարոզարշավ անել, ես դա ո՛չ ընդունում եմ, ո՛չ էլ դա անող եմ: Կա այսպիսի մի վտանգ, ամենամեծ վտանգը՝ ռոբասերժական կլանը չպիտի իր դիրքերն ամրապնդի: Ես՝ որպես ընդդիմություն, ավելի նախընտրում եմ, որ սրանք չամրապնդվեն, քան թե Ավինյանը չվերարտադրվի: Ավինյանը, եթե վերարտադրվի, օրենքը թույլ է տալիս մի տարի հետո անվստահություն հայտնել եւ հեռացնել, բայց երբ ռոբասերժական կլանը ամրապնդվեց, դա կլինի Հայաստանի Հանրապետության վերջը լիակատար, կդառնա գուբերնիա՝ առանց Սյունիքի: Ես գնացի ինձ համար անընդունելի գործարքի, սակայն Հայկ Մարությանն ասաց, որ կա՛մ ինքը քաղաքապետ կլինի, կա՛մ քաղաքապետ չի լինի, ես էլ պատասխանեցի՝ դու չես լինի քաղաքապետ: Հիմա ինձ քաղաքապետի ընտրությունների հարցը չի հուզում, ինձ հետաքրքիր է՝ ինչ է լինելու մինչեւ ամսի 10-ը»,- ասաց նա:

 

Հիշեցնենք՝ Հայկ Մարությանը հայտարարել էր, որ իր խմբակցությունը պատրաստվում է գնալ նոր ընտրության և բոյկոտելու է ավագանու առաջին նիստը՝ նոր ընտրությունների գնալու համար, ըստ նրա՝ այդպես է վարվելու նաև Թևանյանի գլխավորած դաշինքը, և «Հանրային ձայն» կուսակցությանը առաջարկել է նույնպես բոյկոտել՝ իշխանության վերարտադրություն թույլ չտալու համար:

 

Ղուկասյանը արդեն պատասխանել էր այս հայտարարությանը՝ հիշեցնելով, որ որոշ ժամանակ առաջ հատուկ առաջարկով դիմել էր Մարությանին, սակայն համաձայնության չէին եկել: Ըստ նրա՝ ինքը պատրաստ էր միանալ «Ազգային առաջընթաց» կուսակցության և «Մայր Հայաստան» դաշինքի որոշմանը, բոյկոտել ավագանու առաջին նիստը, սակայն մի պայմանով՝ եթե իր հետ պայմանագիր կնքեն՝ ամեն երրորդ թաղապետի պաշտոնն իր ուժին հանձնելու մասին: 

 

Նշենք, որ «Հանրային ձայն» կուսակցությունը սեպտեմբերի 17-ին կայացած Երևանի ավագանու ընտրությունների արդյունքներով ստացել է 7 մանդատ:

 

Ընտրություններին մասնակցած եւ ընտրական շեմը հաղթահարած ոչ մի քաղաքական ուժ չունի 33 մանդատ, որը պետք է քաղաքապետ ընտրելու համար:

 

 

Նոյյան տապան  -   Ի՞նչ է գրում մամուլը