Եվրոպայի խորհրդի Գլխավոր քարտուղարը ժամանել է Բաքու
08-12-2023 12:53:50 | Հայաստան | Ի՞նչ է գրում մամուլը
Ազատություն. Եվրոպայի խորհրդի Գլխավոր քարտուղար Մարիա Պեյչինովիչ Բուրիչը ժամանել է Բաքու։
«Սկսելով իմ պաշտոնական այցը Ադրբեջան՝ ողջունում եմ Հայաստանի և Ադրբեջանի միջև այսօրվա համատեղ հայտարարությունը։ Դրական քայլ՝ ճիշտ ուղղությամբ։ Եվրոպայի խորհուրդը շարունակում է պատրաստ լինել աջակցելու երկու կողմերին՝ կայուն խաղաղության հասնելու համար»,- X-ի իր էջում գրել է Բուրիչը։
Ըստ ադրբեջանական լրատվամիջոցների՝ Բուրիչն այսօր հանդիպել է Ադրբեջանի նախագահ Իլհամ Ալիևի հետ։
Հանդիպումից մանրամասներ դեռ չեն հաղորդվում։
Երեկ Հայաստանի վարչապետի աշխատակազմն ու Ադրբեջանի նախագահի վարչակազը համատեղ հայտարարությամբ տեղեկացրեցին, որ Հայաստանն ազատ է արձակում 2 ադրբեջանցի, Ադրբեջանը՝ 32 հայ զինծառայողների։ Երևանն ու Բաքուն միևնույն ժամանակ շեշտեցին՝ համակարծիք են, որ տարածաշրջանում վաղուց սպասված խաղաղության հասնելու պատմական հնարավորություն կա: Երկու պետությունները վերահաստատեցին ինքնիշխանության և տարածքային ամբողջականության սկզբունքների հարգման հիման վրա հարաբերությունները կարգավորելու և խաղաղության պայմանագրի կնքմանը հասնելու իրենց մտադրությունը:
ՀԱՅԵՐԵՆ
Русский
English
Դաս. հայերեն
French
