Հայաստանը խաղաղության պայմանագիրը կստորագրի, երբ վստահ լինի, որ դա ի շահ իրեն է լինելու․ Խանդանյան

08-12-2023 13:05:32 | Հայաստան | Ի՞նչ է գրում մամուլը

Հայկական ժամանակ. Արդյոք Ադրբեջանի և Հայաստանի վարչապետների աշխատակազմերի ընդհանուր հայտարարությունը կբերի՞ պայմանավորվածության նաև խաղաղության պայմանագրի ավելի վաղ ստորագրման համար:

Հարցին այսօր Ազգային ժողովում լրագրողների հետ ճեպազրույցի ժամանակ անդրադարձավ «Քաղաքացիական պայմանագիր» խմբակցության պատգամավոր Սարգիս Խանդանյանը։

«Խաղաղության պայմանագրի ստորագրումը միշտ մոտ ժամկետում հավանական ենք համարում, որովհետև կառուցողական ենք տրամադրված դրան։ Պետք է հավատարմություն հայտնվի այն սկզբունքների համար, ու փաստաթուղթը ունենա այն տեքստը, որը հնարավոր կլինի Հայաստանի համար ստորագրել, և որին իր համաձայնությունը կտա նաև Ադրբեջանը։

Հայտարարության ընդունումը դրական կարող է ազդել, դրական բառապաշար կա առնվազն հայտարարության տեքստի մեջ, ինչը կնպաստի հետագա բանակցությունների ընթացքին»,- ասաց նա։

Պատգամավորի խոսքով՝ Հայաստանը այդ պայմանագիրը կստորագրի, երբ վստահ լինի, որ դա ի շահ իրեն է լինելու. «Ադրբեջանը պետք է վերահաստատի Հայաստանի տարածքային ամբողջականության ճանաչման մասին իր հայտարարությանը»։

Հիշեցնենք՝ երեկ հրապարակվել էր ՀՀ վարչապետի աշխատակազմի և Ադրբեջանի նախագահի վարչակազմի համատեղ հայտարարությունը գերիների փոխադարձ ազատ արձակման մասին: Ավելի ուշ ադրբեջանական լրատվամիջոցները հրապարակել էին ազատ արձակվող հայ զինծառայողների անունները։

Նոյյան տապան - Ի՞նչ է գրում մամուլը