Հայաստանի և Ադրբեջանի միջև սահմանազատման և սահմանային անվտանգության հարցերով հանձնաժողովի ղեկավար, ՀՀ փոխվարչապետ Մհեր Գրիգորյանը 2023թ. դեկտեմբերի 15-ին Երևանում ԶԼՄ ներկայացուցիչների հետ զրույցում, մասնավորապես, հայտարարել է. «…սահմանազատման գործընթացը, նաև այդուհետ սահմանագծման, կարծում եմ՝ բավականին երկար կտևի, որովհետև արդեն մի քանի անգամ ասել եմ, դա շատ բարդ գործընթաց է»:
Օկուպանտ և ցեղասպան Ադրբեջանի սուլթան Իլհամ Ալիևի աշատակազմի արտաքին հարաբերությունների բաժնի ղեկավար Հիքմեթ Հաջիևը 2023թ. դեկտեմբերի 19-ին Լոնդոնում ԶԼՄ ներկայացուցիչների հետ ունեցած զրույցում, մասնավորապես, ասել է. «Ադրբեջանը մեծ խոչընդոտներ չի տեսնում իր հարևան Հայաստանի հետ կայուն խաղաղության պայմանագրի կնքման համար և կարծում է, որ սահմանների որոշման հարցը կարող է լուծվել առանձին …սահմանների սահմանագծման հարցը պետք է անջատվի խաղաղության պայմանագրի քննարկումներից»:
Վերոնշյալ մեջբերումները հաշվի առնելով՝ կարող ենք հանգել հետևյալ եզրակացության. շատ լավ հասկանալով, որ Հայաստանի և Ադրբեջանի միջև սահմանագծման և սահմանազատման հարցի կարգավորումը տևելու է շատ երկար՝ Ադրբեջանը կարևորություն չի տալիս նշված հարցին: Փոխարենն Ադրբեջանի գործող վարչակազմը կենտրոնացել է խաղաղության պայմանագրի ստորագրման հարցի վրա և ձգտում է հասնել Հայաստանի հետ տվյալ փաստաթղթի ստորագրմանը, որով Հայաստանն առաջին անգամ գրավոր կերպով կընդունի Արցախի պատկանելիությունը Ադրբեջանին:
ՀԱՅԵՐԵՆ
Русский
English
Դաս. հայերեն
French
