ԵՐԵՎԱՆՈՒՄ ԿԱՆՑԿԱՑՎԻ «ՀԱՅԱՍՏԱՆԻ ՍՈԽԱԿ» ՎՈԿԱԼԻՍՏՆԵՐԻ ԱՌԱՋԻՆ
ՀԱՆՐԱՊԵՏԱԿԱՆ ՄՐՑՈՒՅԹԸ
18-11-2008 19:55:00 | Հայաստան | Մշակույթ
ԵՐԵՎԱՆ, 18 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հայաստանում նոյեմբերի
17-ից դեկտեմբերի 14-ը կանցկացվի հռչակավոր օպերային երգչուհի
Գոհար Գասպարյանի անվան «Հայաստանի սոխակ» խորագրով վոկալիստների
առաջին հանրապետական մրցույթը: Ինչպես «ՆՈՅՅԱՆ ՏԱՊԱՆ»-ի թղթակցին
հայտնեցին ՀՀ մշակույթի նախարարությունից, մրցույթին կմասնակցեն
երաժշտական քոլեջների սովորողները, Երեւանի Կոմիտասի անվան պետական
կոնսերվատորիայի ուսանողներն ու ասպիրանտները, ինչպես նաեւ 18-32
տարեկան պրոֆեսիոնալ կատարողները:
Մրցութային պարտադիր ծրագրում ընդգրկված են 17-18 դարերի
կոմպոզիտորների ստեղծագործություններից արիաներ, Կոմիտասի
ստեղծագործությունները, հայ կոմպոզիտորների օպերային արիաներ եւ
ռոմանսներ: Մրցույթի գալա-համերգն ու հաղթողների պարգեւատրման
արարողությունը կկայանա դեկտեմբերի 14-ին` երգչուհու ծննդյան օրը,
Ալ.Սպենդիարյանի անվան օպերայի եւ բալետի ազգային ակադեմիական
թատրոնում: Մրցութի կազմկոմիտեն հաղթողների համար սահմանել է
դրամական մրցանակներ. առաջին տեղի համար` 300 հազար, 2-րդ տեղի
համար` 250 հազար, 3-րդ տեղի համար` 200 հազար դրամ: Բացի այդ,
նախատեսվում են նաեւ խրախուսիչ մրցանակներ ամենաերիտասարդ
մասնակցի, Գասպարյանի երգացանկի լավագույն կատարման, ինչպես նաեւ
լավագույն կոնցերտմայստերի համար:
Օպերային մեծ երգչուհի Գոհար Գասպարյանը մահացել է 2007թ.
մայիսին` 83 տարեկան հասակում: 1949 թվականից նա երգել է 23
օպերաների գլխավոր արիաները: Երգչուհու երգացանկում ընդգրկվել է
ռուս, գերմանացի, ֆրանսիացի եւ իտալացի կոմպոզիտորների մոտ 500
ստեղծագործություն: