04-05-2024 12:27:20 | Հայաստան | Ի՞նչ է գրում մամուլը
Ազատություն. Կոլումբիայի իշխանությունները պաշտոնապես խզել են դիվանագիտական հարաբերություններն Իսրայելի հետ:
Այդ մասին հաղորդագրություն է տեղադրվել Կոլումբիայի ԱԳՆ-ի X (նախկին Twitter) էջում:
«Կոլումբիայի արտաքին գործերի նախարարությունը տեղեկացնում է, որ Բոգոտայում Իսրայելի դեսպանը ծանուցվել է դիվանագիտական հարաբերությունները խզելու իշխանությունների որոշման մասին», - ասվում է հաղորդագրության մեջ։
Կոլումբիայի արտաքին գերատեսչությունը միաժամանակ նշում է, որ երկու երկրների հյուպատոսությունների աշխատանքը Թել Ավիվում և Բոգոտայում կշարունակվի։
Մայիսի 1-ին, ելույթ ունենալով Աշխատավորների միջազգային օրվա կապակցությամբ կազմակերպված հանրահավաքում, Կոլումբիայի նախագահ Գուստավո Պետրոն ասել է, որ մայիսի 2-ին երկիրը կխզի հարաբերությունները Իսրայելի հետ, որի իշխանությունները, ըստ նրա, ցեղասպանության քաղաքականություն են վարում Գազայի գոտում։
Կոլումբիայի իշխանությունները բազմիցս են խստորեն քննադատել Իսրայելին՝ Մերձավոր Արևելքում վարած քաղաքականության համար: