ԵՐԵՎԱՆ, 7 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ՄԱԿ-ի Զարգացման ծրագրի «Մարդու իրավունքների պաշտպանություն, խթանում եւ կրթություն» ծրագրի շրջանակներում հոկտեմբերի 7-ին Երեւանում անցկացվեց «Աջակցություն հանդուրժողականությանը» թեմայով քննարկում, որի ընթացքում Ռուսաստանի եւ Եվրոպայի փորձը ներկայացրեցին Մոսկվայի Հանդուրժողականության ինստիտուտի փորձագետներ Եկատերինա Գենիեւան եւ Սվետլանա Սուլովան: Ինչպես նշեց ՀՀ մարդու իրավունքների պաշտպան Արմեն Հարությունյանը, մարդու իրավունքների պաշտպանությունը առաջին հերթին փոխհարաբերությունների մշակույթ է, որից հետո օրենսդրություն: Բացի այդ, ըստ նրա, օրենսդրությունը կարող է շատ լավը լինել, սակայն օրենքները կարող են չափից ավելի վատ աշխատել, ինչպես որ դա Հայաստանում է: Դրա պատճառն, Ա.Հարությունյանի կարծիքով, այն է, որ Հայաստանում ձեւավորված չէ փոխհասկացողության մշակույթը: «Մեր հասարակությունը կարիք ունի հանդուրժողականության: Խնդիրն այն է, որ ոչ թե մեզանում չկա հանդորժողականության մթնոլորտ, այլ որ մենք դեռեւս չենք գիտակցում դրա կարեւորությունը հանրապետության զարգացման համար»,- նա: Ծրագրի համակարգող Մարինա Մալխասյանը նշեց, որ 2007թ.-ից իրականացվող այս ծրագրի շրջանակներում ստեղծվել է Հանդուրժողականության ցանց, որտեղ ընդգրկված են մոտ 35 հասարակական կազմակերպություններ: Ըստ նրա, ներկայումս որոշ կազմակերպություններ ՄԱԶԾ-ի ֆինանսավորմամբ հանրապետության մարզերում իրականացնում են հանդուրժողականության խթանմանն ուղղված ծրագրեր: Բացի այդ, Մարդու իրավունքների պաշտպանի գրասենյակին կից նախատեսվում է ստեղծել Հանդուրժողականության կենտրոն:

---