«Զելենսկու և Պուտինի հանդիպումը հնարավոր է, եթե...». Պեսկովը նշել է պայմանը


«Զելենսկու և Պուտինի հանդիպումը հնարավոր է, եթե...». Պեսկովը նշել է պայմանը

  • 17-05-2025 13:20:07   | Հայաստան  |  Ի՞նչ է գրում մամուլը

 
Sputnik. Դմիտրի Պեսկովն ասել է, որ փաստաթղթեր ստորագրելիս Մոսկվայի համար գլխավորն ու սկզբունքայինը ուկրաինական կողմից ստորագրող անձի թեկնածությունն է։
 
ՌԴ նախագահ Վլադիմիր Պուտինի և Ուկրաինայի առաջնորդ Վլադիմիր Զելենսկու հանդիպումը հնարավոր է, եթե երկու երկրների պատվիրակությունները որոշակի պայմանավորվածություններ ձեռք բերեն։ Այս հայտարարությունն արել է ՌԴ նախագահի խոսնակ Դմիտրի Պեսկովը։
 
Նա նշել է, որ Ռուսաստանն ու Ուկրաինան պայմանավորվել են փոխանակել հրադադարի պայմանների ցանկերը, և հիմա աշխատանքներ են տարվում։
 
«Առաջին բանը, որ պետք է անել, Ստամբուլում ձեռք բերված պայմանավորվածություններն իրականացնելն է` ներառյալ «1000-ը 1000-ի դիմաց» սկզբունքով գերիների փոխանակումը»,– հավելել է Պեսկովը:
 
ՌԴ նախագահի մամուլի քարտուղարի խոսքով` ռուսական և ուկրաինական պատվիրակությունների միջև փաստաթղթեր ստորագրելիս Մոսկվայի համար գլխավորն ու սկզբունքայինը ուկրաինական կողմից ստորագրող անձի թեկնածությունն է։
 
Ավելի վաղ ՌԴ նախագահ Վլադիմիր Պուտինն Ուկրաինային առաջարկել էր մայիսի 15-ին Ստամբուլում վերսկսել առանց նախապայմանների ուղիղ բանակցությունները։ Նա չէր բացառել, որ համապատասխան բանակցությունների ընթացքում կողմերը կարող են համաձայնության գալ հրադադարի վերաբերյալ։
 
Մայիսի 16-ին Ստամբուլում ռուս–ուկրաինական բանակցություններ անցկացվեցին, որոնց ներկա էր նաև թուրքական կողմը։
 
Շուրջ 2 ժամ տևած հանդիպումից հետո ռուսական պատվիրակության ղեկավար Վլադիմիր Մեդինսկին հայտարարեց, որ ռուսական պատվիրակությունը գոհ է բանակցությունների արդյունքից, պայմանավորվել են, որ յուրաքանչյուր կողմը մանրամասն կներկայացնի հրադադարի պայմանների իր տեսլականը, դրանից հետո բանակցությունները կշարունակվեն։Հանդիպման ընթացքում պայմանավորվել են նաև մոտակա օրերին գերիների փոխանակում իրականացնել «1000–ը 1000–ի դիմաց» բանաձևով։
 
 
Նոյյան տապան  -   Ի՞նչ է գրում մամուլը