ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆԸ ՆՊԱՏԱԿԱՀԱՐՄԱՐ Է ԳՏՆՈՒՄ ԱՐՄԱՆ
ԲԱԲԱՋԱՆՅԱՆԻ ՊԱՅՄԱՆԱԿԱՆ ՎԱՂԱԺԱՄԿԵՏ ԱԶԱՏ ԱՐՁԱԿՈՒՄԸ
15-07-2008 20:00:00 | Հայաստան | Իրավունք
ԵՐԵՎԱՆ, 15 ՀՈՒԼԻՍԻ, ՆՈՅՅԱՆ ՏԱՊԱՆ: Մոտ օրերս
«Դատապարտյալներին պատիժը կրելուց պայմանական վաղաժամկետ ազատելու
կամ պատժի չկրած մասն ավելի մեղմ պատժատեսակով փոխարինելու անկախ
հանձնաժողով»-ը քննարկելու է «Ժամանակ Երեւան» օրաթերթի գլխավոր
խմբագիր Արման Բաբաջանյանի` պատիժը կրելուց պայմանական վաղաժամկետ
ազատելու վերաբերյալ ՀՀ ԱՆ «Դատապարտյալների հիվանդանոց» ՔԿՀ-ի
միջնորդությունը:
ՀՀ Մարդու իրավունքների պաշտպանի աշխատակազմի տեղեկատվության
եւ հասարակայնության հետ կապերի բաժինը հիշեցնում է, որ 2007թ.
հուլիսին` «Նուբարաշեն» ՔԿՀ-ի եւ 2007թ. դեկտեմբերին
«Դատապարտյալների հիվանդանոց» ՔԿՀ-ի համապատասխան
միջնորդությունները անկախ հանձնաժողովի կողմից մերժվել են:
Նկատի ունենալով, որ Ա.Բաբաջանյանը նախկինում դատապարտված չի
եղել, ինչպես նաեւ հաշվի առնելով խնդրի հասարակական նշանակությունը
եւ վերջին շրջանում միջազգային հեղինակավոր իրավապաշտպան եւ
լրագրողական կազմակերպությունների հայտարարությունները, ՀՀ Մարդու
իրավունքների պաշտպանը նպատակահարմար է գտնում նրա պայմանական
վաղաժամկետ ազատ արձակումը: