ԵՐԵՎԱՆ, 8 ՓԵՏՐՎԱՐԻ, ՆՈՅՅԱՆ ՏԱՊԱՆ: ՀՀ Մարդու իրավունքների պաշտպանի հանձնարարությամբ ստեղծված աշխատանքային խմբի կողմից ՀՀ Արդարադատության նախարարության «Էրեբունի» քրեակատարողական հիմնարկում փետրվարի 5-ին կատարված ուսումնասիրությունների արդյունքում պարզվել է, որ ՔԿՀ-ում պատիժ են կրում 420 դատապարտյալներ, եւ դա այն դեպքում, երբ երդարադատության նախարարի հրամանի համաձայն նշված ՔԿՀ-ի համար սահմանվել է լրակազմ 391 դատապարտյալի համար: Բացի դրանից, ինչպես նշում է արդարադատության նախարարին հասցեագրված իր նամակում ՀՀ Մարդու իրավունքների պաշտպան Արմեն Հարությունյանը, հիմնարկում բացակայում է կիսաբաց տիպի ռեժիմով դատապարտյալներին պահելու պայմանները, հիմնարկը չունի ջեռուցման համակարգ, կացարանները տաքացվում են էլեկտրական սալիկներով: Գրեթե բոլոր կացարանները ենթակա են կապիտալ վերանորոգման: Հիմնարկի ճաշարանում կատարած ուսումնասիրության ժամանակ պարզվել է, որ դատապարտյալների համար պատրաստված «բրնձով եւ մակարոնով շիլային» ավելացվել է 5 տուփ պահածոյացված մսամթերք` յուրաքանչյուրը 860 գրամ: Տվյալ պարագայում խախտվել է կառավարության որոշման պահանջները, ըստ որի, յուրաքանչյուր դատապարտյալին օրական տրամադրվում է 90 գրամ միս: Այսինքն, ըստ էության կառավարության կողմից նախատեսված 90 գրամ մսամթերքի փոխարեն «Էրեբունի» քրեակատարողական հիմնարկի վարչակազմի կողմից տրամադրվել է մոտ 11 գրամ, ինչը նորմատիվներից պակաս է շուրջ 9 անգամ: Ելնելով վերոգրյալից եւ ղեկավարվելով «Մարդու իրավունքների պաշտպանի մասին» ՀՀ օրենքի դրույթներով, Ա.Հարությունյանը խնդրել է արդարադատության նախարարին տալ իր պարզաբանումները վերոհիշյալ հարցերի կապակցությամբ:

---