ԱՄՆ-ում բնակվող մի խումբ մտավորականներ հուսով են, որ
հնարավոր կլինի կանխել Հայաստանում ու սփյուռքում հուսալքության
նոր ալիքի գոյացումը
21-01-2010 19:18:00 | Հայաստան | Մշակույթ
ԵՐԵՎԱՆ, 21 ՀՈՒՆՎԱՐԻ, ՆՈՅՅԱՆ ՏԱՊԱՆ: ԱՄՆ-ում բնակվող մի խումբ
մտավորականներ նամակ են հղել Հայաստանի ղեկավարներին եւ
լրատվամիջոցներին, որում մտահոգություն են հայտնել Հայաստանի
պետական կամերային նվագախմբում ստեղծված անառողջ իրավիճակի
վերաբերյալ: Նամակում, մասնավորապես, ասված է.
«Վերջին օրերին համառ լուրեր են տարածվում Հայաստանի պետական
կամերային նվագախմբում առկա անառողջ մթնոլորտի եւ զուտ մարդկային
հարաբերությունների մասին: Ըստ այդ տեղեկությունների, միջազգային
համարում ունեցող հայաստանյան հերթական նվագախումբը հայտնվել է
պառակտման եզրին: Այս անգամ անարդար թշնամանքի թիրախ է ընտրվել
մաեստրո Արամ Ղարաբեկյանը:
Այժմ մենք չենք ցանկանում անդրադառնալ մանրամասներին, վստահ
լինելով, որ դուք տեղյակ եք դրանց: Մինչդեռ բուն երեւույթը չենք
կարող շրջանցել:
Հայաստանի եւ արտերկրի երաժշտասերներին մաեստրո Արամ
Ղարաբեկյանը հայտնի է բարձր պրոֆեսիոնալիզմով, իր աշխատանքային
անմնացորդ նվիրումով եւ անշահախնդրությամբ: Իրականություն, որը չեն
հերքում անգամ իր չարակամները: Միեւնույն ժամանակ գիտակցում ենք,
որ խստապահանջությունը` առաջին հերթին իր անձի եւ իր ղեկավարած
նվագախմբի նկատմամբ, կարող էր դառնալ ընդվզման առիթ, հատկապես այդ
նույն արժեքները չկրող եւ պատասխանատվության նվազ զգացումով օժտված
որոշ անձանց մոտ:
Գիտակցելով, որ այս հարցը հանրապետության ամենաբարձր
ատյանների առաջնահերթ հոգածության խնդիրներից չէ, այնուամենայնիվ
կցանկանանք ձեր ուշադրությունը հրավիրել` հավատալով, որ դրանով
հնարավոր կլինի կանխել Հայաստանում ու սփյուռքում հուսալքության
նոր ալիքի գոյացումը»: