ՀԱՅԱՍՏԱՆԻ ԱԶԳԱՅԻՆ ԳՐԱԴԱՐԱՆՈՒՄ ԿԱՅԱՑԱՎ «ՇՈՒՇԻ»
ՓԱՍՏԱՎԱՎԵՐԱԳՐԱԿԱՆ ՖԻԼՄԻ ՑՈՒՑԱԴՐՈՒԹՅՈՒՆԸ
08-05-2008 16:42:00 | Հայաստան | Հասարակություն
ԵՐԵՎԱՆ, 8 ՄԱՅԻՍԻ, ՆՈՅՅԱՆ ՏԱՊԱՆ: Հայաստանի Ազգային
գրադարանում (ՀԱԳ) մայիսի 8-ին կայացավ ռեժիսոր Աշոտ Գեւորգյանի
«Շուշի» փաստավավերագրական ֆիլմի ցուցադրությունը` նվիրված Շուշիի
ազատագրման 16-ամյակին: 45 րոպեանոց ֆիլմում ներկայացված է Շուշիի
հիմնադրման պատմությունը, բերդաքաղաքի ազատագրման մարտական
գործողությունները եւ դրանց մասնակցած ազատամարտիկների
պատմությունները:
ՀՀ Պաշտպանության նախարարության Տեղեկատվության վարչության
գլխավոր խմբագիր Ղուկաս Սիրունյանի խոսքերով, նախարարության
նախաձեռնությամբ հսկայական աշխատանք է տարվում ի մի բերելու
Արցախյան ազատամարտի ժամանակ նկարահանած բոլոր ժապավենները,
որպեսզի հետագայում սերունդներին ներկայացվի պատերազմական
գործողությունների իրական պատկերը: «Արցախյան պատերազմը մեզ բերեց
հաղթանակ, եւ մենք պարտավոր ենք այդ հաղթանակի մասին պատմել ներկա
եւ հետագա սերունդներին»,- նշեց Ղ.Սիրունյանը:
ՀԱԳ-ի տնօրեն Դավիթ Սարգսյանը հայտնեց, որ մինչեւ մայիսի վերջ
գրադարանում կկազմակերպվեն ղարաբաղյան պատերազմի մասին ֆիլմերի
ցուցադրություններ: «Ֆիլմերը ցուցադրվում են թե գրադարանի
աշխատակիցների, թե ուսանողների, թե տարբեր գերատեսչությունների
ներկայացուցիչների համար: Այդ կերպ մենք փորձում ենք երիտասարդ
սերնդին ներկայացնել մեր պատմության հաղթական էջերը»,- ընդգծեց
Դ.Սարգսյանը: