ԵՐԵՎԱՆՈՒՄ ԱՆՑԿԱՑՎԵՑ ԲԱԴՄԻՆԹՈՆԻ «ԱՐՄԵՆԻԱՆ ՕՓԵՆ» ԱՌԱՋԻՆ
ՄԻՋԱԶԳԱՅԻՆ ՄՐՑԱՇԱՐԸ
31-03-2008 18:10:00 | Հայաստան | Սպորտ
ԵՐԵՎԱՆ, 31 ՄԱՐՏԻ, ՆՈՅՅԱՆ ՏԱՊԱՆ: Բադմինթոնի միջազգային եւ
հայկական ֆեդերացիաների նախաձեռնությամբ մարտի 28-29-ին Երեւանում
անցկացվեց «Արմենիան օփեն» բադմինթոնի միջազգային առաջին մրցաշարը,
որին մասնակցեցին Հայաստանի, Բուլղարիայի, Ռուսաստանի եւ Արցախի
16-ական մարզիկ-մարզուհիներ: Մրցաշարը հովանավորել էր Բուլղարիայի
բադմինթոնի ֆեդերացիայի նախագահ, մարզաձեւի միջազգային ֆեդերացիայի
Բալկանյան եւ Սեւծովյան երկրների կոմիտեի նախագահ, բուլղարահայ
Բուզանդ Կասաբյանը:
Տղամարդկանց մենախաղերում հաղթեց Վասիլի Կուզնեցովը (Մոսկվա),
իսկ կանանց մենախաղերում` Աննա Նազարյանը (Երեւան): Զուգախաղերում
առաջինն էին Հայկ Միսակյան - Սարգիս Հակոբյան եւ Աննա Նազարյան -
Սոնա Ղուկասյան երկյակները (Երեւան):
Մրցաշարի ավարտից հետո մասնակիցները ցուցադրական խաղերով
հանդես եկան Գյումրիում եւ Վանաձորում: