ՀԻՄՆԱՆՈՐՈԳՈՒՄԻՑ ՀԵՏՈ ԱՅՑԵԼՈՒՆԵՐԻ ԱՌՋԵՎ ԵՐԵՎԱՆՈՒՄ ԻՐ ԴՌՆԵՐԸ
ԲԱՑԵՑ ՌՈՒՍԱԿԱՆ ԱՐՎԵՍՏԻ ԹԱՆԳԱՐԱՆԸ
28-10-2008 20:00:00 | Հայաստան | Մշակույթ
ԵՐԵՎԱՆ, 28 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հիմնանորոգումից հետո
հոկտեմբերի 28-ին այցելուների առաջ իր դռները բացեց Ռուսական
արվեստի թանգարանը, որը շուրջ 25 տարի չէր ենթարկվել վերանորոգման.
թանգարանի տարածքը քայքայվում էր, նկարները` վնասվում: Թանգարանի
առաջին այցելուների թվում էր նաեւ ՀՀ նախագահ Սերժ Սարգսյանը:
Ինչպես լրագրողների հետ զրույցում նշեց թանգարանի տնօրեն
Անահիտ Ֆլջյանը, թանգարանի շենքը հիմնանորոգվեց շնորհիվ ՀՀ
նախագահի կողմից Հայաստանի սոցիալական ներդրումների հիմնադրամի
գումարներից հատկացված 37 մլն. դրամի (շուրջ 120 հազար ԱՄՆ դոլար):
Եվս 350 հազար ռուբլի թանգարանին է հատկացրել Մոսկվայի
կառավարությունը:
Թանգարանը սկզբնապես ստեղծվել է պրոֆեսոր Արամ Աբրահամյանի
անձնական հավաքածուի հիման վրա, այնուհետեւ վերածվել Ռուսական
արվեստի թանգարանի, որի հավաքածուում ներկայումս առկա է 19-րդ
դարավերջի եւ 20-րդ դարասկզբի շուրջ 120 ռուս նկարիչների 333
գործ` հեղինակների թվում են, մասնավորապես, Սերովը, Կորովինը,
Արխիպովը, Նեստերովը, Վրուբելը, Գոլովինը, Սերեբրյակովան, Բենուան,
Կուստոդիեւը, Ռերիխը եւ շատ ուրիշներ: Հիմնանորոգումից հետո
թանգարանն ունի 8 սրահ, այդ թվում` թանգարանի հիմնադիր Արամ
Աբրահամյանի հիշատակի սրահը:
Ըստ Ա.Ֆլջյանի, 333 աշխատանքներից շուրջ 80-ը գտնվում է
ֆոնդերում, սակայն թանգարանում նախատեսվում է կազմակերպել երեկոներ
հասարակության համար, թեմատիկ ցուցահանդեսներ, ինչը
հնարավորություն կտա ցուցադրել նաեւ ֆոնդերում գտնվող նկարները:
Տնօրենը որպես թանգարանի առջեւ ծառացած լուրջ խնդիր նշեց այն, որ
անհրաժեշտություն կա վերականգնելու վնասված նկարները, թանգարանի
տնօրենը հույս ունի, որ կկարողանա մասնագետ հրավիրել Մոսկվայից:
ՀՀ մշակույթի նախարար Հասմիկ Պողոսյանը նկատեց. «Ժամանակին մի
հավաքածու դարձավ թանգարան, աշխարհի տարբեր անկյուններում քանի՞
այդպիսի հավաքածու կա, որ պետք է բերենք Հայաստան եւ դարձնենք
թանգարաններ: Շատ կարեւոր է, որ այսօր ՀՀ նախագահը խոսում է այն
մասին, որ մենք պետք է կառուցենք տուն-թանգարանի շենք, որտեղ մենք
կկարողանանք այսպիսի հավաքածուները բերել եւ ցուցադրել»: