ԱՐԹՈՒՐ ՂՈՒԿԱՍՅԱՆԸ «ՀԱՅՖԵՍՏ» ԹԱՏԵՐԱԿԱՆ 6-ՐԴ ՓԱՌԱՏՈՆԸ ՀԱՄԱՐԵՑ
ՀԱՋՈՂՎԱԾ
14-10-2008 19:45:00 | Հայաստան | Մշակույթ
ԵՐԵՎԱՆ, 14 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հոկտեմբերի 4-12-ը
կայացած «ՀայՖեստ» 6-րդ միջազգային թատերական փառատոնը եզրափակվել
է արտասահմանյան փառատոների եւ թատրոնների հետ համագործակցության
վերաբերյալ մի շարք պայմանավորվածություններով: Ինչպես հոկտեմբերի
14-ի ասուլիսում հայտնեց փառատոնի նախագահ Արթուր Ղուկասյանը,
նախնական պայմանավորվածություն կար ռեժիսոր Վահան Բադալյանի եւ
իտալական «Վերսիլիդանցա» թատրոնի միջեւ, որոնց հետ փառատոնի
շրջանակներում համատեղ բեմադրվել էր «7 զգացողություն» պարային
դրաման: Իսկ հանրահայտ բրիտանացի դրամատուրգ Մարկ Ռավենհիլի հետ
կանցկացվեն սեմինարներ դրամատուրգների եւ սցենարիստների համար:
Բացի այդ, նախատեսվում է նաեւ բեմադրել համատեղ հայ-անգլիական
ներկայացում: «Անտագոն» թատրոնի նախաձեռնությամբ առաջիկայում
Հայաստանում կստեղծվի երեխաների համար թատերական դպրոց:
Գնահատելով անցած փառատոնի գործունեությունը եւ ընթացքը Ա.
Ղուկասյանը նշեց, որ այն անցել է բավականին բարձր մակարդակով եւ
մեծ արձագանք է ստացել մամուլում: Ընդհանուր առմամբ, բեմադրվել է
80 ներկայացում 15 բեմահարթակներում:
«Հայֆեստ»-ի պատասխաատուն նշեց նաեւ, որ մի քանի
ներկայացումների ժամանակ դահլիճների կիսադատարկ լինելը որոշ չափով
իրենց «մեղավորությունն է», «սակայն հանրությանը պարբերաբար տեղյակ
է պահվել ներկայացումների մասին, այնպես որ, հանդիսատեսի մոտ
բացակայել է ներկայացումը դիտելու ցանկությունը: Ներկայացումների
բազմալեզու լինելը եւս խնդիր է առաջացրել, սակայն դրանք
թարգմանելու համար բավական միջոցներ են հարկավոր, չնայած մի քանի
բեմադրություններ հայերեն թարգմանվել են ենթատողերով»: