«ՈՍԿԵ ԾԻՐԱՆ - 2008» ՄԻՋԱԶԳԱՅԻՆ ԿԻՆՈՓԱՌԱՏՈՆԸ ՀԱՅՏԱՐԱՐԵԼ Է
ՄՐՑԱՆԱԿԱԿԻՐՆԵՐԻ ԱՆՈՒՆՆԵՐԸ
21-07-2008 19:00:00 | Հայաստան | Մշակույթ
ԵՐԵՎԱՆ, 21 ՀՈՒԼԻՍԻ, ՆՈՅՅԱՆ ՏԱՊԱՆ: Երեւանի «Մոսկվա»
կինոթատրոնում հուլիսի 19-ին անվանի կինոռեժիսոր Ատոմ Էգոյանի
«Երկրպագություն» ֆիլմի ցուցադրությամբ ազդարարվեց «Ոսկե ծիրան»
երեւանյան 5-րդ միջազգային կինոփառատոնի ավարտը: Կինոնկարի
երեւանյան պրեմիերային ներկա էին ՀՀ նախագահ Սերժ Սարգսյանը,
վարչապետ Տիգրան Սարգսյանը, մշակույթի նախարար Հասմիկ Պողոսյանը,
բարձրաստիճան այլ հյուրեր, կինոաշխարհի հայտնի դեմքեր:
Կանադահայ ռեժիսոր Ատոմ Էգոյանի խոսքերով, «Ոսկե ծիրան»-ը մեծ
նշանակություն ունի հայ ազգի համար. «Այն ցույց է տալիս ոչ միայն
հզոր ազգի կինոարվեստը, այլեւ մյուս ազգերի կինոարվեստն է բերում
Հայաստան»: Ֆիլմի ավարտից հետո «Լաթար» հյուրանոցային համալիրում
կայացած հանդիսության ժամանակ հայտարարվեցին «Ոսկե ծիրան»-ի այս
տարվա մրցանակակիրների անունները:
Գլխավոր «Ոսկե ծիրան»-ը լավագույն խաղարկային ֆիլմի համար
շնորհվել է մոսկվաբնակ հայ ռեժիսոր Աննա Մելիքյանին` «Ջրահարսը»
կինոնկարի համար: Խաղարկային մրցույթի «Արծաթե ծիրան»-ը կիսվել է
երկու ռեժիսորների միջեւ. թաիլանդցի Ադիտյա Ասարաթին` «Հրաշալի
քաղաքը» եւ իսրայելցի Էրան Ռիկլիսին` «Կիտրոնի ծառը» ֆիլմերի
համար: Նույն անվանակարգում ժյուրիի դիպլոմի է արժանացել նաեւ
իրանցի կինոռեժիսոր Աբոլֆազլ Սաֆարիին` «Աշխարհի եզրը» ժապավենի
համար:
Վավերագրական ֆիլմերի մրցույթում գլխավոր «Ոսկե ծիրան»-ին է
արժանացել նիդեռլանդցի Մեյրա Աշերը` «Կանայք շատ բան են տեսնում»
ֆիլմի համար: Իսկ «Արծաթե ծիրան»-ին` հնդկուհի Նիշտա Ջաին`
«Լաքշմին եւ ես» կինոնկարի համար:
«Հայկական համայնապատկեր» մրցութային ծրագրի «Ոսկե ծիրան»-ը
տրվել է ամերիկահայ երիտասարդ կինոռեժիսոր Էրիկ Նազարյանին`
«Կապույտ ժամը» ֆիլմի համար: Իսկ «Գաթա» կինոնկարի ռեժիսոր Դիանա
Մկրտչյանին շնորհվել է «Արծաթե ծիրան»-ը: Ժյուրիի դիպլոմն այս
մրցույթում ստացել է «Ջրառատ. Մանրապատումներ» ֆիլմը ներկայացրած
Մարիամ Օհանյանը:
«FIPRESCI»-ի ժյուրիի անդամները որոշում էին կայացրել մրցանակը
հանձնել «Իմ Մարլոնն ու Բրանդոն» ֆիլմի ռեժիսոր Հուսեյն Կարաբեյին`
Թուրքիայից: Կինոռեժիսորը շահել էր նաեւ Էկումենիկ ժյուրիի
դիպլոմը: Իսկ Էկումենիկ ժյուրիի բարձրագույն գնահատականին է
արժանացել Էրիկ Նազարյանի «Կապույտ ժամը» ֆիլմը: