ՖՐԱՆՍԻԱՆ ԵՎ ԹՈՒՆԻՍԸ ՊԱՅՄԱՆԱՎՈՐՎԵԼ ԵՆ ՀԱՄԱԳՈՐԾԱԿՑԵԼ ԱՏՈՄԱՅԻՆ
ՈԼՈՐՏՈՒՄ
29-04-2008 19:25:00 | Թունիս | Միջազգային
ԹՈՒՆԻՍ, 29 ԱՊՐԻԼԻ, ՆՈՅՅԱՆ ՏԱՊԱՆ: Ֆրանսիան եւ Թունիսը
համաձայնագիր են ստորագրել ատոմային էներգետիկայի բնագավառում
համագործակցության վերաբերյալ:
Համաձայնագիրը ստորագրվել է Թունիսում Ֆրանսիայի նախագահ
Նիկոլա Սարկոզիի երկօրյա պետական այցի ժամանակ: Փաստաթուղթը
նախատեսում է համագործակցություն կրթության, հետազոտությունների,
անվտանգության, ինչպես նաեւ էլեկտրականության մատակարարումների եւ
ուրանի որոնման երկրաբանահետախուզական աշխատանքների բնագավառում:
Սարկոզիի պաշտոնավարման ընթացքում սա արդեն հինգերորդ
նմանօրինակ միջազգային համաձայնագիրն է. մինչ այս ատոմային
ոլորտում համագործակցության մասին ֆրանսիացիները պայմանավորվել են
Մարոկկոյի, Ալժիրի, Լիբիայի եւ Արաբական Էմիրությունների հետ: