ՍՔԻՆՀԵԴՆԵՐԻ ՁԵՌՔՈՎ ՏԱՐՎԱ ՍԿԶԲԻՑ ՌՈՒՍԱՍՏԱՆՈՒՄ ՍՊԱՆՎԵԼ Է 49
ՄԱՐԴ
31-03-2008 19:05:00 | Ռուսաստան | Միջազգային
ՄՈՍԿՎԱ, 31 ՄԱՐՏԻ, ՆՈՅՅԱՆ ՏԱՊԱՆ: Ռուսաստանում տարեսկզբից
արմատական ազգայնամոլների հարձակումների զոհ է դարձել 49 մարդ,
հաղորդում է «Ինտերֆաքսը»:
«2008 թվականի հունվարից մինչեւ մարտ ընկած ժամանակամիջոցում
Ռուսաստանում ագրեսիվ այլատյացության հողի վրա 86 հարձակում է
գրանցվել, որոնց արդյունքում կան 49 սպանված եւ առնվազն 80
տուժածներ»,- ասել է Մարդու իրավունքների Մոսկվայի գրասենյակի
տնօրեն Ալեքսանդր Բրոդը:
Ըստ նրա, 2008 թվականի առաջին ամիսներին սքինհեդների
հարձակումների զոհ են դարձել առավել հաճախ ղրղզները (9 սպանված, 4
տուժած), տաջիկները (6 սպանված, 22 տուժած) եւ ուզբեկները (8
սպանված, 1 տուժած):
Բրոդը նշել է, որ ռասիստական հարձակումների թվով 2008
թվականին առաջատարներ են Մոսկվան եւ Մոսկվայի մարզը (28 սպանված,
առնվազն 57 տուժած) եւ Սանկտ Պետերբուրգը (8 սպանված, 6 տուժած):
Բրոդը նշել է նաեւ, որ ըստ իրավապաշտպանների
տեղեկությունների, Ռուսաստանում գործում են մոտ 70 հազար
սքինհեդներ: