ԲԱՂԴԱԴ, 26 ՄԱՐՏԻ, ՆՈՅՅԱՆ ՏԱՊԱՆ: Անհայտ գրոհայինների կողմից
այսօր Բաղդադում գնդակոծվել է ԱՄՆ-ի դեսպանությունը: Ինչպես
հայտնել է դիվանագիտական առաքելության ներկայացուցիչը, մի քանի
հրթիռ կամ ականանետային արկեր են պայթել նրա տարածքում, որ գտնվում
է խստորեն պահպանվող «կանաչ գոտու» սահմաններում: ԱՄՆ-ի երեք
քաղաքացիներ ծանր վիրավորվել են:
Նշվում է նաեւ, որ առնվազն 14 մարդ զոհվել է, եւս 140-ը
վիրավորվել Բաղդադի Մադինաթ-Սադր շիաների թաղամասում բռնկած
բախումների ընթացքում: Մարտական գործողություններին մասնակցում են
ամերիկյան զորքերը: Նրանց կորուստների մասին տվյալներ չկան:
Բասրայից ստացվող հաղորդումների համաձայն, այնտեղ
շարունակվում են բախումները կառավարական ուժերի եւ «Մահդիի բանակ»
շիա խմբավորման զինյալների միջեւ: Բախումների ընթացքում զոհվել է
50 մարդ, եւս 200-ը վիրավորվել:
Իրաքի անվտանգության ուժերը Բասրայում գրոհում են «Մահդիի
բանակ» խմբավորման գրոհայինների դիրքերը, որ գլխավորում է շիա
արմատական իմամ Մուքթադա աս-Սադրը:
Իրաքի վարչապետ Նուրի ալ-Մալիքին Բասրայի գրոհայիններին
հրահանգել է 72 ժամվա ընթացքում վայր դնել զենքը: