ՆՅՈՒ ՅՈՐՔ, 3 ՄԱՐՏԻ, ՆՈՅՅԱՆ ՏԱՊԱՆ: Ռուսաստանն ընդունել է
ՄԱԿ-ի Անվտանգության խորհրդի նախագահությունը: Սպասվում է, որ
արդեն առաջին օրերին, երբ ՄԱԿ-ին առընթեր ՌԴ մշտական ներկայացուցիչ
Վիտալի Չուրկինը կգլխավորի Խորհուրդը, այնտեղ կարող է կայանալ
Իրանի նկատմամբ պատժամիջոցները խստացնող բանաձեւի քվեարկությունը:
ՄԱԿ-ի ԱԽ-ի անդամներին փետրվարին չհաջողվեց համաձայնեցնել
փաստաթղթի նախագիծը եւ քվեարկություն անցկացնել, հաղորդում է
ԻՏԱՌ-ՏԱՍՍ-ը:
Միավորված ազգերի կազմակերպությանն առընթեր ՌԴ մշտական
ներկայացուցիչը հայտարարել է, որ այս ամսին ՄԱԿ-ի Անվտանգության
խորհուրդը կքննարկի, այդ թվում, Լիբանանում առկա իրավիճակը:
«Ռուսաստանը կցանկանար եւս մեկ բանավեճ անցկացնել Լիբանանի
առնչությամբ: ՄԱԿ-ի Անվտանգության խորհուրդը կխրախուսի տարաբնույթ
գործունեությունը տարածաշրջանում կագուկանոնի հաստատման
ուղղությամբ»,- ասել է Չուրկինը:
Դրանից բացի, ըստ նրա, «մոտ ապագայում կքննարկվի Պաղեստինի
իրադրությունը, մասնավորապես հումանիտար կացությունը Գազայի
հատվածում»: «Մենք կարծում ենք, որ այդ իրադրությունը պետք է
կարգավորվի ըստ կարելվույն արագ»,- ընդգծել է դիվանագետը: