ՎԱԽՃԱՆՎԵԼ Է ՌՈՒՍԱԿԱՆ ԲԱԼԵՏԻ ՊԱՐՈՒՀԻ ՆԱՏԱԼՅԱ ԲԵՍՍՄԵՐՏՆՈՎԱՆ
19-02-2008 19:36:00 | Ռուսաստան | Միջազգային
ՄՈՍԿՎԱ, 19 ՓԵՏՐՎԱՐԻ, ՆՈՅՅԱՆ ՏԱՊԱՆ: Մոսկվայում 67 տարեկան
հասակում վախճանվել է աշխարհահռչակ ռուս պարուհի Նատալյա
Բեսսմերտնովան: Այս մասին տեղեկացրել են Մեծ թատրոնի մամլո
ծառայությունում, որին նա նվիրել է իր ստեղծագործական կյանքի գրեթե
հիսուն տարին:
Մոսկվայի պարարվեստի ուսումնարանի շրջանավարտ Նատալյա
Բեսսմերտնովան Մեծ թատրոն եկավ, երբ դեռ այդ նշանավոր դպրոցի սան
էր: Նրա ընդունակությունները դրսեւորվեցին վաղ պատանեկության
տարիներին եւ Մեծ թատրոնի առաջատար բալետմայստերները նրան էին
վստահում իրենց ներկայացումների գլխավոր դերերը:
Նատալյա Բեսսմերտնովան գլխավոր դերեր է պարել իր ամուսնու`
Յուրի Գրիգորովիչի բեմադրած բալետներում: Դրանց թվում են` «Ռոմեո
եւ Ջուլիետ», «Լեգենդ սիրո մասին», «Իվան Ահեղ», «Ոսկե դար»:
Թողնելով բեմը Նատալյա Բեսսմերտնովան մանկավարժական մեծ աշխատանք
էր կատարում եւ Մեծ թատրոնի մանկավարժ-կրկնուսույցն էր: