ԵՄ-Ն ՀԱՍՏԱՏԵԼ Է ԿՈՍՈՎՈ ՔԱՂԱՔԱՑԻԱԿԱՆ ԱՌԱՔԵԼՈՒԹՅՈՒՆ
ՈՒՂԱՐԿԵԼՈՒ ՈՐՈՇՈՒՄԸ
11-02-2008 18:50:00 | Բելգիա | Միջազգային
ԲՐՅՈՒՍԵԼ, 11 ՓԵՏՐՎԱՐԻ, ՆՈՅՅԱՆ ՏԱՊԱՆ: Եվրոպական միությունն
այսօր վերջնականապես լուծել է Կոսովո քաղաքացիական առաքելություն
ուղարկելու հարցը: Սպասվում է, որ առաքելությունն այնտեղ կուղարկվի
այն բանից հետո, երբ երկրամասը կհայտարարի իր անկախության եւ
Սերբիայից անջատվելու մասին, հաղորդում է ԻՏԱՌ-ՏԱՍՍ-ը:
Եվրոպական 27 պետությունների դեսպանները համաձայնեցրել են
առաքելություն ուղարկելու բոլոր մանրամասները, որը կազմված կլինի
1800 ոստիկաններից եւ իրավաբաններից: Առաքելությունը պետք է
փոխարինի ՄԱԿ-ի վարչակազմին, որի խնամատարության տակ այսօր գտնվում
է Կոսովոն: Այսպիսով, երկրամասը ՄԱԿ-ի իրավասությունից կանցնի ԵՄ
պատասխանատվության ոլորտը:
Սպասվում է, Կոսովոյի իշխանությունները երկրամասի
անկախությունը կհռչակեն արդեն այս կիրակի օրը, չնայած Բելգրադի
անհամաձայնությանը: