ՎԱՇԻՆԳՏՈՆ, 8 ՓԵՏՐՎԱՐԻ, ՆՈՅՅԱՆ ՏԱՊԱՆ: Հինգշաբթի երեկոյան Սավաննայի (Ջորջիայի նահանգ) արվարձանի շաքարի գործարանում տեղի ունեցած հզոր պայթյունի հետեւանքով վիրավորվել է մի քանի տասնյակ մարդ: Առնվազն ինը համարվում են անհետ կորած: Ըստ քաղաքի ոստիկանության ներկայացուցչի, «վիրավորվել է 50-ից մինչեւ 100 մարդ»: Հիվանդանոցներ են արդեն փոխադրվել տասնյակ մարդիկ, որոնցից 32-ի վիճակը բժիշկները գնահատում են ծանր: Ներկայումս գործարանի տարածքում մոլեգնում է ուժեղ հրդեհ, որը առայժմ չի հաջողվում հանգցնել: Ըստ ականատեսների, պայթյունն այնքան ուժեղ է եղել, որ միանգամից ավերել է գործարանի հինգ հարկանի շենքի մի մասը: Ձեռնարկությունը, որտեղ տեղի է ունեցել միջադեպը, պատկանում է «Սավաննա ֆուդ էնդ ինդաստրիզ» ընկերությանը, որը շաքարի ամենախոշոր արտադրողն է ԱՄՆ-ում:

---