ԵԱՀԿ-Ն ՀՐԱԺԱՐՎԵԼ Է ԴԻՏՈՐԴՆԵՐ ՈՒՂԱՐԿԵԼ ՌԴ ՆԱԽԱԳԱՀԻ
ԸՆՏՐՈՒԹՅՈՒՆՆԵՐԻՆ
07-02-2008 17:00:00 | Ռուսաստան | Միջազգային
ՄՈՍԿՎԱ, 7 ՓԵՏՐՎԱՐԻ, ՆՈՅՅԱՆ ՏԱՊԱՆ: ԵԱՀԿ Ժողովրդավարական
հաստատությունների եւ մարդու իրավունքների գրասենյակը (ԺՀՄԻԳ) չի
կարողանա իր դիտորդներին ուղարկել Ռուսաստան նախագահական
ընտրություններին: Այս մասին, ինչպես հաղորդում է ԻՏԱՌ-ՏԱՍՍ-ը,
ասվում է ԺՀՄԻԳ-ի տնօրեն Քրիստիան Շտրոխալի հայտարարության մեջ:
Ըստ նրա, «Ռուսաստանը դիտորդների համար սահմանել է այնպիսի
սահմանափակումներ, որոնք անհնար են դարձնում նախանշված
առաքելության իրականացումը ԺՀՄԻԳ-ի մանդատի հիման վրա` ԵԱՀԿ
մասնակից պետությունների հանդեպ պարտավորություններին
համապատասխան»:
ԵԱՀԿ Խորհրդարանական վեհաժողովը նույնպես հրաժարվել է
դիտորդների ուղարկել: «Մենք ցավում ենք, որ հանգամանքներն այնպես
դասավորվեցին, որ մենք չենք կարող մասնակցել Ռուսաստանի նախագահի
ընտրությունների դիտարկմանը»,- ասվում է ԵԱՀԿ ԽՎ գլխավոր քարտուղար
Սպենսեր Օլիվերի անունից Պետդումա ուղարկված հայտարարության մեջ:
Այս շաբաթվա սկզբին ՌԴ ԿԸՀ-ն բանակցություններ էր վարում
ընտրություններին ԺՀՄԻԳ-ի դիտորդների առաքելության ժամանման շուրջ:
Վերջինս վերջնագրային պահանջներ էր առաջադրել: Իսկ ՌԴ ԱԳՆ ղեկավար
Սերգեյ Լավրովը, մեկնաբանելով ԺՀՄԻԳ-ի դիրքորոշումը, հայտարարել
էր, թե Ռուսաստանը որպես «իրեն հարգող երկիր վերջնագրեր չի
ընդունում»: