ԼԵՀԱՍՏԱՆԸ ՀԱՄԱՁԱՅՆ Է ԻՐ ՏԱՐԱԾՔՈՒՄ ՏԵՂԱԿԱՅԵԼ ՆԱՏՕ-Ի ԲԱԶԱՆԵՐ
01-02-2008 15:03:00 | ԱՄՆ | Միջազգային
ՎԱՇԻՆԳՏՈՆ, 1 ՓԵՏՐՎԱՐԻ, ՆՈՅՅԱՆ ՏԱՊԱՆ: Վարշավան պատրաստ է իր
տարածքում ընդունել ՆԱՏՕ-ի ռազմական օբյեկտներ` անվտանգության
հարցերում ԱՄՆ-ի հետ հարաբերությունների ամրացման համար: Այս
մասին, ինչպես հաղորդում է «Ինտերֆաքսը», Վաշինգտոնում հայտարարել
է Լեհաստանի արտաքին գործերի նախարար Ռադոսլավ Սիկորսկին:
«Մենք ՆԱՏՕ-ի անդամ ենք 1999 թվականից, եւ մեզ մոտ չկա ՆԱՏՕ-ի
որեւէ լուրջ օբյեկտ, իսկ մենք ՆԱՏՕ-ի սահմանապահ երկիր ենք: Մենք
համարում ենք, որ ՆԱՏՕ-ի ենթակառուցվածքը, պաշտպանական
ենթակառուցվածքը պետք է քիչ թե շատ հավասարապես տեղաբաշխված լինի
(դաշինքի) տարածքում: Ներկա պահին դա չկա»,- ասել է Սիկորսկին`
ավելացնելով. «Մեր հողի վրա ամերիկյան զորքերի հեռանկարը այն է,
ինչ մենք կողջունեինք»:
Այսօր ծրագրված է Սիկորսկու հանդիպումը ԱՄՆ-ի պետքարտուղար
Կոնդոլիզա Ռայսի հետ: Ամերիկյան ԶԼՄ-ների տեղեկություններով,
նրանք, մասնավորապես, քննարկելու են այն պայմանները, որոնց դեպքում
Լեհաստանը կհամաձայներ իր մոտ տեղակայել ամերիկյան հակահրթիռային
պաշտպանության տարրեր: