ՊԱԿԻՍՏԱՆԻ ՄԱՅՐԱՔԱՂԱՔՈՒՄ ԻՆՔՆԱՍՊԱՆՈՒԹՅՈՒՆ Է ԳՈՐԾԵԼ ԱՄԵՐԻԿԱՑԻ
ԴԻՎԱՆԱԳԵՏԸ
29-01-2008 18:00:00 | | Միջազգային
ԻՍԼԱՄԱԲԱԴ, 29 ՀՈՒՆՎԱՐԻ, ՆՈՅՅԱՆ ՏԱՊԱՆ: Պակիստանի մայրաքաղաք
Իսլամաբադում ինքնասպան է եղել ամերիկացի մի դիվանագետ: Այս մասին
հայտնել է Reuters գործակալությունը` վկայակոչելով երկրի ՆԳՆ
ղեկավար Համիդ Նավազի հայտարարությունը:
«Մենք ենթադրում ենք, որ դա ինքնասպանություն է, սակայն
հետաքննություն ենք կատարում»,- ասել է նախարարը:
Պակիստանյան ԶԼՄ-ների տվյալներով, դիվանագետի մարմինը
հրազենային վերքով հայտնաբերվել է իր տանը, որ գտնվում է
դեսպանատան կողքին:
Պակիստանում ԱՄՆ-ի դեսպանությունը հայտարարություն է տարածել,
ուր նշվում է, որ ամերիկյան դիվանագիտական առաքելության աշխատակից
Կիտ Ռայանը «վախճանվել է» երկուշաբթի, ըստ որում չեն նշվում
դիվանագետի մահվան պատճառները եւ հանգամանքները: