«ԳԱԶՊՐՈՄԸ» ԸՆԴՈՒՆԱԿ Է ԱՊԱՀՈՎԵԼ ԵՄ-Ի ԳԱԶԻ ՊԱՀԱՆՋՄՈՒՆՔՆԵՐԸ,-
ՀԱՅՏԱՐԱՐՈՒՄ Է ՌԴ ՆԱԽԱԳԱՀԸ
18-01-2008 21:15:00 | Բուլղարիա | Միջազգային
ՍՈՖԻԱ, 18 ՀՈՒՆՎԱՐԻ, ՆՈՅՅԱՆ ՏԱՊԱՆ: Ռուսաստանն ու «Գազպրոմն»
ի վիճակի են «լիովին ապահովել» Եվրոպայի երկրների
գազամատակարարումների աճող պահանջարկը: Այս մասին, ինչպես
հաղորդում են ռուսական ԶԼՄ-ները, այսօր Սոֆիայում մամլո ասուլիսի
ժամանակ հայտարարել է Ռուսաստանի նախագահ Վլադիմիր Պուտինը:
Պատասխանելով դեպի Եվրոպա նոր խողովակաշարերի կառուցման հետ
կապված արտասահմանում ռուսական գազի պահանջվածության մասին հարցին,
ռուսական պետության ղեկավարն ընդգծել է, որ Ռուսաստանին «պետք չէ
որեւէ մեկին համոզել» ռուսական գազ գնելու անհրաժեշտությունը:
«Վերջին հինգ տարիների ընթացքում մեր թուրք գործընկերները
ամեն տարի խնդրում են ավելացնել թուրքական շուկա մատակարարվող գազի
ծավալները: Արտասովոր սառը եղանակի պատճառով կան եւ Միջին Ասիայից
գազի մատակարարումների խափանումներ»,- նկատել է Պուտինը`
ավելացնելով. «Այդուամենայնիվ, Ուկրաինայի, ԱՊՀ երկրների, ողջ
Արեւմտյան Եվրոպայի բոլոր պահանջմունքները Ռուսաստանը փակում է
բացառապես «Գազպրոմի» մատակարարումներով»: