ԱՎՍՏՐԱԼԻԱՅՈՒՄ ՆՈՅԵՄԲԵՐԻ 24-ԻՆ ԿԿԱՅԱՆԱՆ ՀԱՄԸՆԴՀԱՆՈՒՐ
ԸՆՏՐՈՒԹՅՈՒՆՆԵՐ
15-10-2007 14:10:00 | Ավստրալիա | Միջազգային
ԿԱՆԲԵՐԱ, 15 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ավստրալիայի վարչապետ
Ջոն Հովարդը հոկտեմբերի 14-ին հայտարարել է, որ նոյեմբերի 24-ին
երկրում կկայանան համընդհանուր ընտրություններ, հաղորդում է
«Ասոշիեյթեդ պրես» գործակալությունը:
68-ամյա Ջոն Հովարդը, որ արդեն 11 տարի զբաղեցնում է
կառավարության նախագահի պաշտոնը, պայքարելու է երկրում կառավարման
հինգերորդ ժամկետի համար: Հովարդը գլխավորում է պահպանողական
Լիբերալ-ազգային կուսակցությունը: Նրա հիմնական ընդդիմախոսը
Լեյբորիստական կուսակցության առաջնորդ 50-ամյա Քեւին Ռադդն է:
Սպասվում է, որ առաջիկա ընտրարշավը կլինի ամենակոշտը վերջին
տարիների ընթացքում: Տվյալ պահին հասարակական կարծիքի հարցումները
հաղթանակ են խոստանում ընդդիմադիր Լեյբորիստական կուսակցության
ղեկավարին: