ԵՐԵՎԱՆՈՒՄ ՄԵԿՆԱՐԿԵՑ «ԱՐԵՎԵԼՔԻ ՋԱՀ» ՄԻՋԱԶԳԱՅԻՆ 16-ՐԴ
ՓԱՌԱՏՈՆԸ
10-09-2007 18:40:00 | Հայաստան | Մշակույթ
ԵՐԵՎԱՆ, 10 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սեպտեմբերի 10-ին
Երեւանում մեկնարկեց «Տեսնել Արարատը» խորագրով «Արեւելքի ջահ»
միջազգային 16-րդ փառատոնը: Ինչպես նշեց փառատոնի նախագահ Հիդեո
Սակատան, հայ արվեստագետները միշտ էլ աչքի են ընկել իրենց տաղանդով
եւ յուրահատուկ մտածելակերպով, այդ պատճառով էլ ընդունվել է
Հայաստանում փառատոնի անցկացման առաջարկը:
Նշվեց, որ փառատոնը հիմնադրվել է ասիական ծագում ունեցող
արվեստագետների կողմից: Այն ամեն տարի կազմակերպվում է տարբեր
երկրներում, որպեսզի փառատոնին մասնակցող արվեստագետները
հաղորդակցվեն տարբեր ազգերի մշակույթների հետ:
Հայաստանյան փառատոնի համանախագահ Ռազմիկ Հաջիկյանը նշեց, որ
փառատոնին մասնակցում են չորս տասնյակից ավելի նկարիչներ եւ
քանդակագործներ ԱՄՆ-ից, Գերմանիայից, Ֆրանսիայից, Ճապոնիայից,
Թաիլանդից, Հարավային Կորեայից եւ այլ երկրներից: Փառատոնի
շրջանակներում կբացվեն մի շարք ցուցահանդեսներ, կանցկացվեն կրթական
միջոցառումներ, այդ թվում տեսողության խանգարումներ ունեցող
երեխաների Երեւանի թիվ 14 հատուկ դպրոցում կկազմակերպվեն
կավագործության դասընթացներ` հաշմանդամ երեխաների առջեւ բացելով
արհեստագործությամբ զբաղվելու եւ դրանով իսկ հասարակությանը առավել
դյուրին ինտեգրվելու հեռանկարներ: